Hurmatli yurtdoshlar, jamoatchilik vakillari hamda yo‘l xo‘jaligi sohasi xodimlari!

Mamlakatimizda davlat va jamiyat boshqaruvining turli sohalarida korrupsiyaning oldini olish va unga qarshi kurashish borasida izchil hamda samarali chora-tadbirlar amalga oshirilmoqda.

Bu borada, davlatimiz rahbarining 2025 yil 21 apreldagi “Davlat organlari va tashkilotlarining korrupsiyaga qarshi ichki nazorat bo‘linmalari mustaqilligini ta’minlash hamda faoliyati samaradorligini oshirish chora-tadbirlari to‘g‘risida”gi qarori muhim ahamiyatga egadir.

Mazkur hujjat bilan Korrupsiyaga qarshi ichki nazorat bo‘linmalari faoliyatini yanada kuchaytirish, yangicha tizim asosida ishlab, ular faoliyat samaradorligini oshirish maqsadida bir qator yangi mexanizmlar joriy etilishi belgilandi.

Davlatimiz rahbari tomonidan korrupsiyaga qarshi kurashish borasida olib borilayotgan siyosatdan o‘rnak olgan holda va ushbu yo‘nalishda berilgan topshiriqlarning ijrosini ta’minlash maqsadida Avtomobil yo‘llari qo‘mitasida ham korrupsiyaga qarshi kurashish borasida bir qator ishlar amalga oshirildi.

Jumladan, Qo‘mitaning korrupsiyaga qarshi kurashish faoliyatini samarali tashkil etish maqsadida 2025 yil 30 maydagi 41-sonli buyrug‘i bilan Qo‘mita markaziy apparatida ikki nafar xodimdan iborat “Korrupsiyaga qarshi ichki nazorat” bo‘limi hamda Qoraqalpog‘iston Respublikasi va viloyatlar Avtomobil yo‘llari Bosh boshqarmalarida bir nafardan Korrupsiyaga qarshi ichki nazorat bo‘yicha bosh mutaxassis lavozimi joriy etildi.

Mas’ullarning mustaqilligini ta’minlash maqsadida hududiy ichki nazorat bo‘yicha bosh mutaxassislarni lavozimga qabul qilish, lavozimdan ozod etish va ularga intizomiy yoki rag‘batlantirish choralarini ko‘rish Qo‘mita raisining buyrug‘i bilan amalga oshirilishi belgilandi.

Shuningdek, Qo‘mita va uning idoraviy mansub tashkilotlarining budjet mablag‘laridan samarali foydalanishini tashkil etish hamda uning ustidan doimiy ravishda monitoring va nazorat olib borish maqsadida Qo‘mita markaziy apparatida tegishli malaka sertifikatlariga ega bo‘lgan mutaxassislardan iborat Ichki audit xizmati ham tashkil etildi.  

Ushbu yo‘nalishlarda lavozimlarni malakali kadrlar bilan ta’minlagan holda faoliyatini samarali tashkil etish borasida amalga oshirilayotgan chora-tadbirlar eng muhim qadamlardan biri bo‘lib, so‘zsiz o‘zining ijobiy natijalarini beradi.

Tizimda korrupsiyaga qarshi kurashishning huquqiy asoslarini mustahkamlash maqsadida bir qator ichki me’yoriy hujjatlar qabul qilindi, jumladan:

“Avtomobil yo‘llari qo‘mitasida manfaatlar to‘qnashuvi bilan bog‘liq munosabatlarni tartibga solish to‘g‘risida” buyruq qabul qilindi;

O‘zbekiston Respublikasi Bosh prokuraturasi bilan birgalikda “Avtomobil yo‘llarida korrupsiyaviy omillarni aniqlash va bartaraf qilish hamda “korrupsiyadan xoli” muhitni yaratish borasida manzilli
chora-tadbirlarni amalga oshirish to‘g‘risida “Yo‘l xaritasi” tasdiqlandi;

Qo‘mitaning tegishli buyrug‘i bilan “Manfaatlar to‘qnashuvini boshqarish bo‘yicha nizom” tasdiqlandi.

Shu o‘rinda ayrim raqamlarga e’tiboringizni qaratmoqchiman.

Qo‘mita va uning tizim tashkilotlaridagi 4 000 nafarga yaqin xodimlarning qo‘shimcha ravishda tadbirkorlik faoliyati bilan shug‘ullanish holati o‘rganilib, manfaatlar to‘qnashuvini keltirib chiqarish ehtimoli mavjudligi sababli aniqlangan 300 ta holat bo‘yicha xodimlarning tadbirkorlik faoliyatiga chek qo‘yilgan.

Qo‘mitaning 59 ta funksiyasi korrupsiyaviy xavf-xatar bo‘yicha baholashdan o‘tkazilib, xavf-xatari “yuqori” va “o‘rta” darajada bo‘lgan funksiyalar “past” darajaga tushirildi.

Qo‘mita va tizim tashkilotlaridan jami 29 nafar xodim korrupsiyaga qarshi kurashish bo‘yicha maxsus o‘quv darslarida o‘qitilib, ISO 37001:2016 xalqaro sertifikatini qo‘lga kiritdi.

Hozirda Qo‘mita va uning hududiy bosh boshqarmalari tomonidan
ISO 9001 xalqaro sertifikatini qo‘lga kiritish bo‘yicha amaliy ishlar olib borilmoqda.

Qo‘mita va uning tizim tashkilotlarida xodimlarning tadbirkorlik faoliyati bilan shug‘ullanish holatlari, xodimlarning o‘rindoshlik asosida tizim tashkilotlariga kirish holatlari, jismoniy va yuridik shaxslardan manfaatlar to‘qnashuvi holatlari bo‘yicha kelib tushgan murojaatlari, xodimlarning manfaatlar to‘qnashuvi deklaratsiyalarini to‘ldirish holatlari doimiy ravishda o‘rganib borilmoqda.

Tizimda korrupsiyaga qarshi kurashish borasida 13 ta ichki hujjatlar ishlab chiqilib, barcha soha xodimlari ushbu hujjatlar bilan tanishtirilishi ta’minlandi:

—korrupsiyaga qarshi kurashish siyosati;

—odob-axloq qoidalari;

—korrupsiyaviy xavf-xatarlarni baholash uslubiyoti;

—manfaatlar to‘qnashuvini boshqarish bo‘yicha nizom;

—aloqa kanallari orqali korrupsiyaviy xatti-harakatlar to‘g‘risida kelib tushgan xabarlarni qabul qilish va ko‘rib chiqish reglamenti;

—xodimlarning korrupsiyaga qarshi kurashish sohasida o‘qitilishini tashkil qilish bo‘yicha yo‘riqnoma;

—kontragentlarni tekshirishga oid yo‘riqnoma;

—ishga qabul qilinayotgan nomzodlarni tekshirish bo‘yicha yo‘riqnoma;

—korrupsiyaga qarshi kurashish samaradorligini monitoring
va nazorat qilish uslubiyoti;

—korrupsiyaga qarshi kurashish tizimining holati haqidagi hisobotni shakllantirish va taqdim etish reglamenti;

—korrupsiyaviy xatti-harakatlar va odob-axloq qoidalarini buzish holatlari ustidan xizmat tekshiruvlarini o‘tkazish bo‘yicha reglament;

—davlat xaridlarini o‘tkazish to‘g‘risida nizom;

—korrupsiyaga oid huquqbuzarliklarni sodir etishga undash holatlari haqida xabar berish, ularni ro‘yxatga olish, ko‘rib chiqish hamda ularga qarshi kurashishdagi xodimlarning faol ishtiroki uchun rag‘batlantirish to‘g‘risida tartib.

Mehnat shartnomalariga korrupsiyaga qarshi shartlar kiritildi.

Barcha xodimlar tomonidan “Manfaatlar to‘qnashuvi to‘g‘risida”gi deklaratsiya to‘ldirilishi hamda yangi ishga qabul qilingan, boshqa ishga o‘tgan xodimlarga manfaatlar to‘qnashuvi to‘g‘risidagi deklaratsiyani muntazam ravishda to‘ldirib borish amaliyoti yo‘lga qo‘yildi.

Korrupsiya holatlari haqida kelib tushgan murojaatlar, o‘tkazilgan xizmat tekshiruvlari hamda korrupsion holatlarga yo‘l qo‘ygan shaxslarga nisbatan qo‘llanilgan intizomiy jazo choralari bo‘yicha reestr yuritilishi amaliyoti yo‘lga qo‘yildi.

Korrupsiya va raqobatga qarshi kurashish bo‘yicha 260 dan ortiq targ‘ibot ishlari amalga oshirildi.

Xodimlarning korrupsiyaga qarshi kurashish hamda davlat  xaridlari bo‘yicha bilim va malakasini oshirish amaliyoti  yo‘lga qo‘yilib, bugungi kunga qadar tizimdagi 350 dan ortiq xodim o‘qitildi.

Korrupsion xatti-harakatlarga nisbatan nafratni uyg‘otuvchi, uning oqibatlarini tavsiflovchi, korrupsiyaga qarshi kurashishga undovchi 150 ta dan ortiq broshyuralar, bukletlar, plakatlar, o‘quv-qo‘llanmalari ishlab chiqildi va chop etildi.  Shuningdek, korrupsiyaga qarshi kurashishni targ‘ib qiluvchi bir qator videoroliklar tayyorlandi.

Sohada korrupsiyaga qarshi kurashish bo‘yicha aniq tadbirlar amalga oshirilishi natijasida “Davlat organlari va tashkilotlarida korrupsiyaga qarshi kurashish ishlarining samaradorligi reytingi”da Avtomobil yo‘llari qo‘mitasi 2022 yildagi qoniqarsiz (37 ball) o‘rindan 2023 va 2024 yillar davomida yaxshi (85 ball) va qoniqarli (73 ball) o‘rinlarni egalladi.

Yuqorida qayd etib o‘tilgan ijobiy natijalarga qaramasdan, korrupsiyaga qarshi kurashish ishlarini izchil davom ettirishimiz va Qo‘mita tizimida “korrupsiya uchun javobgarlik muqarrar” degan qat’iy ijtimoiy fikrni shakllantirishga alohida e’tibor qaratishimiz lozim.

Korrupsiyaga qarshi kurashish bo‘yicha olib borilayotgan davlat siyosatining harakatlantiruvchi kuch sifatida davlat organlari, fuqarolik jamiyati institutlari, fuqarolarimiz tomonidan ushbu illatga qarshi olib borilayotgan kurashni yagona tizimli harakatga aylantirish hamda korrupsiyaga qarshi standartlar me’yorga aylangan, ushbu illatga qarshi murosasizlik va toqatsizlik maksimal nuqtaga chiqqan jamiyat barpo etish eng muhim vazifalarimizdan biridir. Shu bois, yo‘l xo‘jaligi xodimlaridan korrupsiyaga qarshi kurashish tamoyillariga sidqidildan amal qilishlarini, korrupsiyaga qarshi kurashish bo‘yicha hujjatlarda belgilangan vazifalarni mas’uliyat bilan bajarishlarini so‘rab qolaman.

So‘zim oxirida barchani mansabdor shaxslar tomonidan yo‘l qo‘yilayotgan korrupsion holatlar, yuzaga kelayotgan manfaatlar to‘qnashuvi hamda boshqa salbiy oqibatlar yuzasidan Qo‘mitaning tegishli aloqa kanallari orqali bog‘lanishga va korrupsiyaga qarshi kurashda faol ishtirok etishga chaqirib qolaman.

 

Aloqa kanallari:

Ishonch telefoni: +(99871) 207-67-68 (149)

Pochta manzilimiz: info@uzavtoyul.uz

Telegram bot: @uzavtoyul_anticorBot