O‘zbekiston Respublikasi Prezidentining 2025-yil 15-maydagi "2025-2026-yillarda sayyohlar oqimini keskin ko‘paytirish va turistik xizmatlar ko‘lamini jadal kengaytirish orqali turizmning iqtisodiyotdagi o‘rni va ahamiyatini oshirish chora-tadbirlari to‘g‘risida"gi Farmoniga muvofiq "O‘zbekiston bo‘ylab sayohat qil" ichki turizmni rivojlantirish dasturini amalga oshirish uchun har oyning ikkinchi haftasi shanba va yakshanba kunlari oila yoki jamoa bilan sayohatga chiqish kuni sifatida belgilangan.

Ushbu Farmonga asosan Ekologiya vazirligi huzuridagi O‘rmon va yashil hududlarni ko‘paytirish, cho‘llanishga qarshi kurashish agentligi tomonidan Toshkent viloyatining Bo‘stonliq tumanida joylashgan Burchmulla davlat o‘rmon xo‘jaligiga sayohat tashkil qilindi.

Xodimlarning bo‘sh vaqtini mazmunli o‘tkazish va ichki turizmni rivojlantirish maqsadida tashkil etilgan tadbirda Agentlik markaziy apparatida faoliyat olib borayotgan yosh mutaxassislar bilan birgalikda Toshkent davlat agrar universiteti talabalari ham sayohat qilishdi. Ishtirokchilar Burchmulla davlat o‘rmon xo‘jaligida joylashgan hayvonot bog‘i, ko‘chatxona va niholxonalar bilan yaqindan tanishishdi. Shuningdek, o‘rmon xo‘jaligida sayyohlar uchun yaratilayotgan shart-sharoitlar va turizm imkoniyatlari borasida ma’lumotlarga ega bo‘lishdi.

Bu kabi tadbirlar yosh mutaxassislar uchun o‘rmon xo‘jaliklarida qilinayotgan amaliy ishlar bilan yaqindan tanishish bilan birga o‘zaro tajriba orttirish imkoniyatini taqdim etishi bilan ham ahamiyatlidir.