Ushbu xalqaro tadbirda O‘rmon va yashil hududlarni kengaytirish, cho‘llanishga qarshi kurashish agentligi tomonidan “Yashil makon” deb nomlangan ko‘rgazma paviloni tashkil etilgan bo‘lib, unda mamlakatimizda o‘rmon hududlarini kengaytirish, yashillik darajasini oshirish bo‘yicha amalga oshirilayotgan ishlar o‘z aksini topgan.

Mazkur ko‘rgazma hududiga kirgan kishi, jannatmakon yurtimizning boy va betakror tabiati, noyob o‘simliklar olami, niholxonalar va ko‘chatxonalarda o‘rmonchilar mehru mashaqqati bilan parvarish qilinib o‘stirilayotgan daraxt va buta ko‘chatlarini ko‘rib bir olam taassurotlar olishi tayin.

Shuningdek, o‘rmonchilar mehnati bilan yetishtirilayotgan asal mahsulotlari, o‘rmon xo‘jaliklarida tayyorlanayotgan shifobaxsh dorivor mahsulotlari ham O‘rmon agentligining ko‘rgazmasiga tashrif buyurayotgan mehmonlarning e’tibori va e’tirofiga sabab bo‘lmoqda. Eng ahamiyatlisi ko‘rgazmalardan o‘rin olgan takrorlanmas tabiatimiz haqida taassurot uyg‘otuvchi ushbu tabiat olami namunalari tadbir mehmonlarini tabiatni sevishga, o‘z hududida ko‘proq daraxtlar ekib, yashillik yaratishga undaydi.