Toshkent viloyati Bo‘stonliq tumanidagi “Yoshlar oromgohi”da ekologik madaniyatni shakllantirishga bag‘ishlangan seminar bo‘lib o‘tdi.

“Eko-oromgoh–2025” doirasida o‘tkazilgan seminarda Ekologiya, atrof-muhitni muhofaza qilish va iqlim o‘zgarishi vazirligi huzuridagi O‘rmon xo‘jaligi agentligi direktori Erkin Muhiddinov, vazirlik bo‘lim boshlig‘i Zarrina Abdullayeva hamda yoshlar ishtirok etdi.

Seminarda nutq so‘zlagan Erkin Muhiddinov bugun butun dunyoda ekologik muammolar dolzarb tus olayotganligini ta’kidladi.

“Suv tanqisligi, cho‘llanish, atrof-muhitning ifloslanishi, chiqindilar, transportdan tashlanadigan tashlamalar va boshqa tabiiy va antropogen omillar ekologiyaga jiddiy xavf solmoqda. Bu muammolarga ijobiy yechim topishda, albatta, Siz yoshlarning tashabbuslaringiz, ishtirokingiz juda muhim hisoblanadi. Shuning uchun barchangizga atrof-muhitni muhofaza qilishga befarq bo‘lmaganligingiz uchun minnatdorlik bildiramiz va yanada faol bo‘lishga chaqiramiz”, – dedi u.

Tadbir davomida yoshlar ekologik muammolarga yechim izlash borasidagi fikr-mulohazalarini bildirishdi.

“Bizning hudud respublikada cho‘llanish darajasi yuqori hududlardan hisoblanadi, — dedi Navoiy davlat universiteti talabasi Dilmehra Bozorova. — Qolaversa, yurtimizning Qoraqalpog‘iston Respublikasi, Buxoro viloyati kabi hududlarida ham bu muammo kuchaymoqda. Cho‘llanishning oldini olish uchun, avvalo, yashillik darajasini oshirish, qurg‘oqchilikka chidamli daraxtlar ekish lozim”.