O‘zbekiston Respublikasi Prezidenti tomonidan 2025-yil 14-fevral kuni yoshlar bilan ochiq muloqot tarzida o‘tkazilgan videoselektor yig‘ilishida berilgan topshiriqlar ijrosini ta’minlash maqsadida Ekologiya vazirigi huzuridagi O‘rmon xo‘jaligi agentligi direktori Erkin Muhiddinov Toshkent viloyatining Quyi Chirchiq tumanidagi To‘qboy va Baliqchi mahalla fuqarolar yig‘ini hamda Chinoz tumanidagi Bunyodkor va Tinchlik mahalla fuqarolar yig‘inida yashovchi bir guruh kam ta’minlangan, ishsiz yoshlar va ularning yaqinlari bilan uchrashdi.

Ochiq va samimiy ruhda bo‘lib o‘tgan uchrashuvlarda yoshlarning muammolari, reja va maqsadlari tinglandi. Ularning salohiyatini yuzaga chiqarish, talab yuqori bo‘lgan chet tillariga o‘qitish, tadbirkorlik va va boshqa sohalarda faoliyatini tashkil etishda ko‘maklashish hamda mavjud bo‘sh ish o‘rinlariga joylashtirish masalalari yuzasidan tegishli choralar ko‘rilishi belgilandi. Yoshlar tomonidan bildirilgan taklif va tashabbuslar doimo qo‘llab-quvvatlanilishi ta’kidlandi.

"Barchaning orzu va maqsadlari bo‘ladi. Bugungi muloqotda ishtirok etayotgan yoshlarning orzularini amalga oshirishda ko‘makdosh bo‘lsak, ularning jamiyatda o‘z o‘rniga ega bo‘lishiga zamin yaratiladi. Hech qachon oldingizga maqsad qo‘yishdan va mehnat qilishdan to‘xtamang", - dedi E. Muhiddinov.

Tadbirlarda yoshlar bugun davlat tomonidan ularni har tomonlama qo‘llab-quvvatlash maqsadida ko‘rsatilayotgan e’tibor uchun minnatdorchilik bildirishdi.

Yakunda ishtirokchilarga estalik sovg‘alari topshirildi.