Bugun Shahrisabz Madaniyat saroyi faollar zalida Ekologiya vazirligi huzuridagi O‘rmon xo‘jaligi agentligi tomonidan 2025-yil I choragida bajarilgan ishlar hamda yil yakuniga qadar amalga oshirilishi rejalashtirilgan chora-tadbirlar muhokamasiga bag‘ishlangan hay’at yig‘ilishi bo‘lib o‘tdi.

Unda O‘rmon xo‘jaligi agentligi direktori Erkin Muhiddinov, Agentlikning ma’sul rahbar va xodimlari, hududiy davlat o‘rmon xo‘jaliklari rahbarlari ishtirok etdi.

Yig‘ilishni E. Muhiddinov kirish so‘zi bilan ochib, barchani kun tartibi va hay’at a’zolari tarkibi bilan tanishtirdi.

Shundan so‘ng, O‘rmon xo‘jaligi agentligi tizim tashkilotlarida investitsiyalar jalb qilish, moliyaviy barqarorlikni ta’minlash va hududiy o‘rmon xo‘jaliklarining I chorak natijalari yuzasidan tahliliy fikrlarini bildirdi.

O‘zbekiston Respublikasi Prezidentining 2025-yil 30-yanvardagi “O‘zbekiston-2030” strategiyasini “Atrof-muhitni asrash va yashil iqtisodiyot” yilida amalga oshirishga oid davlat dasturi to‘g‘risida”gi 16-son farmonida mamlakatimizda o‘rmonlar hududini kengaytirish va yashillik darajasini oshirishga oid muhim vazifalar belgilangan.

“2025-yilning birinchi choragida 126 ming gektar maydonlarda o‘rmon barpo qilish va qayta tiklash tadbirlari amalga oshirildi. Jumladan, Orolbo‘yi hududlarida jami 124 ming 500 gektar, Buxoro viloyati Olot tumanida 22 ming 300 gektar, Navoiy viloyati Tomdi, Uchquduq tumanlarida 16 ming 200 gektar va Xorazm viloyati Tuproqqa’la tumanida 15 ming gektar maydonda “yashil qoplamalar”, Respublika bo‘yicha 256 gektar maydonda himoya o‘rmonzorlari barpo qilindi. Shuningdek, 500 gektar maydonda terassa usulida o‘rmonlar barpo etish ishlari boshlab yuborilgan”, - dedi E. Muhiddinov.

Ko‘chatchilik sohasini rivojlantirish maqsadida yigirmaga yaqin o‘rmon xo‘jaliklari ko‘chatchilikka ixtisoslashtirilib, bu bo‘yicha qator tadbirlar amalga oshirilmoqda. Biroq, bu borada ayrim o‘rmon xo‘jaliklari tomonidan kamchiliklarga yo‘l qo‘yilayotgani tanqid qilindi.

Yig‘ilish davomida E. Muhiddinov dorivor o‘simliklarni yetishtirish, “Mening bog‘im” loyihasi doirasida “yashil bog‘lar” barpo etish, terassa usulida o‘rmonzorlar yaratish, ijara munosabatlarini to‘g‘ri tashkil etish, yong‘inlarning oldini olish, zararkunanda va kasalliklarga qarshi kurashish kabi masalalarni tahliliy ko‘rib chiqib, mas’ullarga zaruriy tavsiya va topshiriqlar berdi.