O‘zbekiston Respublikasi Prezidentining 2023-yil 23-noyabrdagi "Respublikada ko‘kalamzorlashtirish darajasini yanada oshirish va "Yashil makon" umummilliy loyihasini izchil amalga oshirish orqali ekologik barqarorlikni ta’minlash chora-tadbirlari to‘g‘risida"gi farmoni bilan 2024 - 2028-yillarda Orolbo‘yi mintaqasini barqaror rivojlantirish, innovatsiyalar va "yashil" texnologiyalarni keng joriy etish bo‘yicha milliy dastur tasdiqlandi.

Orolbo‘yi mintaqasida "yashil belbog‘lar"ning yaratilishi ekologik barqarorlikni ta’minlaydi va shahar aglomeratsiyalarining atrof-muhitga ta’sirini kamaytirish imkonini beradi.

O‘zbekiston Respublikasi Ekologiya, atrof-muhitni muhofaza qilish va iqlim o‘zgarishi vazirligi, BMT Taraqqiyot dasturi va Global ekologik jamg‘armaning "Orol dengizi havzasi landshaftining barqaror va degradatsiyaga barqaror hayot tarzini qo‘llab-quvvatlovchi asosi sifatida ko‘llar, suv-botqoq yerlar va qirg‘oqbo‘yi yo‘laklarini saqlash va boshqarish" (Aral Sea Wetlands) qo‘shma loyihasi ham "Yashil makon" umummilliy loyihasining ko‘kalamzorlashtirish tashabbusini amalga oshirishga o‘zining munosib hissasini qo‘shmoqda. Loyihaning asosiy maqsadi muhofaza etiladigan tabiiy hududlar, yerlar degradatsiyasining oldini olish orqali Orol dengizi havzalarida ekotizimlar va yashash vositalarining barqarorligini yaxshilashdan iborat. Orol dengizining fojiali qurishiga qaramay, uning havzasida hali ham muhim ko‘llar, botqoq yerlar va qirg‘oqbo‘yi ekotizimlari mavjud. Orolbo‘yi mintaqasi o‘nlab turdagi ko‘chmanchi qushlarning juda muhim uchib o‘tish yo‘lida joylashgan.