Uchrashuvda mamlakatimizda o‘rmonlar barpo etish orqali atmosferada uglerod miqdorini sezilarli darajada kamaytirish, barqaror uglerod kreditlarini yaratish masalalari yuzasidan hamkorlik istiqbollari muhokama qilindi.

Tomonlar suv resurslaridan oqilona foydalanish, tuproq sho‘rlanishining oldini olish, yong‘inlarga qarshi samarali kurashish, chorva mollarini o‘tlatish, daraxtlarning noqonuniy kesilishiga barham berish, kasallik va zararkunandalarga qarshi tizimli kurashish kabi dolzarb masalalarga e’tibor qaratdilar.

Shuningdek, loyihalarga mahalliy aholini jalb etish orqali yangi ish o‘rinlari yaratish, kambag‘allik darajasini sezilarli kamaytirishga erishish muhim ekanligi ta’kidlandi.

Tadbirda daraxtlarning barqaror o‘sishi ehtimoli yuqori bo‘lgan hududlarda o‘rmonlar barpo etish, ko‘chatxonalar tashkil etish, xalqaro miqyosda tan olingan uglerod standartlariga mos loyiha dizaynini ishlab chiqish, keng ko‘lamli tashabbuslarni amalga oshirish uchun Koreya kompaniyalarining investitsiyalarini jalb qilish, hududlarda ekotizimlarni tiklash orqali ijtimoiy-iqtisodiy muvozanatni ta’minlash bo‘yicha takliflar ilgari surildi.

Ahamiyatlisi, kelajakda mahalliy salohiyatni mustahkamlash,  xalqaro hamkorlik va iqlimni moliyalashtirish imkoniyatlaridan foydalanishni kengaytirish kabi muhim natijalarga erishish kutilmoqda.