Shofirkonda “Yashil makon” umummilliy loyihasi doirasida keng ko‘lamli ko‘kalamzorlashtirish ishlari davom etmoqda
2025-12-05 11:42:00 / Yangiliklar
Tuman bo‘yicha ko‘kalamzorlashtirish ishlari keng qamrovda olib borilmoqda. Joriy mavsumda fermer xo‘jaliklari dalalariga 165 ming tup, bog‘ va tokzorlar barpo etish uchun qariyb 55 ming tup ko‘chat ajratildi. Mahalla hududlarida 150 ming tup nihol ekilishi belgilangan bo‘lsa, Obodonlashtirish boshqarmasi tasarrufidagi yo‘l bo‘ylari, ko‘p qavatli uylar atrofi va boshqa manzillarga 47 ming tupdan ortiq ko‘chatlar ekilmoqda. Shuningdek, o‘rmon fondi yerlari uchun 274 ming tup ko‘chat ajratilgan.
Bundan tashqari, avtomobil yo‘llari bo‘ylari bo‘ylab 17 ming, kanallar, ariqlar va zovurlar atrofini ko‘kalamzorlashtirish uchun qariyb 20 ming tup nihol o‘tqazilishi ko‘zda tutilgan. Maktabgacha ta’lim muassasalari hamda umumta’lim maktablari hududlarida 10 ming tup, sog‘liqni saqlash obyektlari atrofida 9 ming, texnikumlarda 3 ming tup ko‘chat ekilishi rejalashtirilgan. Tijorat banklari va chiqindi poligonlari hududlariga esa yana 16 ming tup ko‘chat ajratilgan.
Shu bilan birga, tumanda yangi tutzorlar barpo etish maqsadida qariyb 94 ming tup ko‘chat ekish ishlari amalga oshirilmoqda.
Bugun daraxt ko'chatlari ekish tadbiri Shofirkon tumanining Mingchinor hududida tashkil etildi. Davlat o‘rmon xo‘jaligining Shofirkon tuman bo‘limi tasarrufidagi 20 gektar maydon ko‘kalamzorlashtirish uchun ajratilgan bo‘lib, bu yerga 17 ming tup ko‘chat ekish rejalashtirilgan.
Tadbirda 3,5 gektar maydon tozalab tayyorlanib, 2 ming tup daraxt ko‘chatlari o‘tqazildi.
Mingchinor hududida o‘tkazilgan ko‘chat ekish tadbirida tuman hokimi Alisher Fayzilloyev, tuman prokurori Shamshod Mamarizayev, tuman IIB boshlig‘i Rustam Yusupov, soliq inspeksiyasi rahbari Otabek Muqimov, banklar va yirik korxonalar rahbarlari, o‘rmon xo‘jaligi mutaxassislari hamda 200 nafarga yaqin fuqarolar faol ishtirok etdi. Ko‘kalamzorlashtirish jarayonlarini tizimli tashkil etish maqsadida 10 ga yaqin maxsus texnika jalb qilindi.
Tuman hokimi o‘z nutqida har bir ekilgan ko‘chatning kelajak uchun toza havo, sog‘lom muhit va tabiiy barqarorlik garovi ekanini ta’kidlab, barcha fuqarolarni ushbu harakatda faol ishtirok etishga chaqirdi.