O‘rmon va yashil hududlarni ko‘paytirish, cho‘llanishga qarshi kurashish agentligi

Tadbirda Ekologiya vazirining birinchi o‘rinbosari Obidjon Qudratov, O‘rmon agentligi direktori Erkin Muhiddinov, davlat idoralari, xalqaro tashkilotlar, ilmiy muassasalar ekspertlari hamda OAV vakillari ishtirok etdi.

Tadbir O‘zbekiston o‘rmon ekotizimlarining ekologik tasnifi bo‘yicha ilmiy ishlanmalarni taqdim etish, zamonaviy texnologiyalarning noyob turlar yashash muhitini saqlashdagi imkoniyatlarini namoyish etish, shuningdek, milliy va xalqaro darajadagi tabiiy resurslarni muhofaza qilish bo‘yicha hamkorlikni mustahkamlash maqsadida tashkil etildi.

Tadbirda so‘z olganlar tabiiy resurslarni baholash, ekotizimlarni monitoring qilish va ulardan barqaror foydalanishda ilmiy asoslangan yondashuvning ahamiyatini alohida ta’kidladilar.

Tadbir davomida O‘zbekistonda ilk bor sun’iy intellekt texnologiyalari, sun’iy yo‘ldosh monitoringi, GIS geoma’lumotlari va raqamli kartografiyaga asoslangan o‘rmonlarning kompleks ekologik tasnifi yaratilgani haqida ma’lumot berildi.

Tadbirning ikkinchi qismida Jahon banki va IUCN vakillari ishtirokida panel muhokamasi o‘tkazildi.

Unda ekologik tasnifning noyob turlarni saqlashdagi roli, RESILAND loyihasi natijalarini milliy rejalashtirishga integratsiya qilish, CITES doirasida monitoring va hisobot yuritishda raqamli ma’lumotlardan foydalanish, mintaqaviy hamkorlik istiqbollari, shuningdek mahalliy aholining tabiatni muhofaza qilish tashabbuslariga jalb etilishi muhokama qilindi.