Vazirlar Mahkamasi huzuridagi O'zbekiston texnik jihatdan tartibga solish agentligi

Mazkur tashabbus O‘zbekistonning qishloq xo‘jaligi mahsulotlarini xalqaro bozorlarga eksport qilish salohiyatini oshirish, ularni xalqaro standartlarga muvofiq sifat nazoratidan o‘tkazish imkoniyatlarini kengaytirishga qaratilgan. 

Yangi o‘quv xonasi texnik jihozlar bilan ta’minlanib, meva va sabzavotlar sifatini baholash, sinov va sertifikatlashtirish sohalarida mutaxassislarni o‘qitish uchun mo‘ljallangan. Unda BMT Taraqqiyot Dasturi, O‘zbekiston texnik jihatdan tartibga solish agentligi hamda boshqa hamkor tashkilotlar ishtirokida treninglar, amaliy seminarlar va tajriba almashuv tadbirlari muntazam tashkil etib borish rejalashtirilgan. 

Joriy yilning 28-oktabr kuni BMT Taraqqiyot dasturining O‘zbekistondagi doimiy vakilasi Akiko Fujii xonim hamda Agentlik direktori Akmal Jumanazarov muayyan tovarlar va belgilangan standartlar talablarini qamrab olish uchun moslashtirilgan, meva va sabzavotlarni sifat va xavfsizlik standartlari bo‘yicha to‘g‘ri baholash hamda tekshirishni o‘rgatishga qaratilgan o‘quv laboratoriyasining ochilish marosimida qatnashib, yaratilgan imkoniyatlar bilan tanishdi. 

Mazkur tashabbus O‘zbekistonning xalqaro savdoda raqobatbardoshligini oshirish, sifat infratuzilmasini mustahkamlash va qishloq xo‘jaligi mahsulotlarini yangi bozorlarga olib chiqish yo‘lidagi muhim qadamdir.