Xalqaro elektrotexnika komissiyasi (International Electrotechnical Comission – IEC) Bosh assambleyaning 88-yig'ilishi
2025-09-17 13:05:00 / Yangiliklar
IEC Bosh assambleyasi tadbirida 100 ta davlat milliy standartlashtirish tashkilotlarining 500 dan ortiq eksperti to‘planishi kutilmoqda.
Ular energetika, elektrotexnika va elektronika sohalarini rivojlantirishda IEC xalqaro standartlarning dolzarbligi, standartlashtirish sohasidagi munosabatlarni tartibga solish, ilmiy-texnikaviy va texnik qo'mitalar faoliyatini takomillashtirish, xalqaro hamkorlikni rivojlantirish, milliy standartlashtirish tizimlarini xalqaro tizim bilan uyg'unlashtirish va boshqa dolzarb masalalarni ko‘rib chiqadi.
Shu bilan birga standartlashtirish tizimi infratuzilmasini takomillashtirish, ilg‘or innovatsion va zamonaviy axborot-kommunikatsiya texnologiyalarini joriy etish, zamonaviy kadrlar tayyorlash va ularning malakasini oshirish tizimini takomillashtirish, "yashil" energetika, sun'iy intellekt, energiya samaradorligi, atrof-muhitni muhofaza qilish va iqlim o‘zgarishi mavzularga e'tibor qaratiladi.
O‘zbekiston delegatsiyasi mamlakatimizning Hindistondagi elchixonasi bilan hamkorlikda xorijiy davlatlarning milliy standartlashtirish idoralari vakillari bilan qator uchrashuvlar o‘tkazishi rejalashtirilgan.
Jumladan, IEC rahbariyati bilan O‘zbekistonni Xalqaro elektrotexnika komissiyasining IECEE muvofiqlikni baholash tizimiga a'zo bo'lish jarayonlarini jadallashtirish, Yaponiya sanoat standartlari qo‘mitasi, Hindiston standartlar byurosi va boshqa milliy tashkilotlar bilan mamlakatimizda tayyorlangan va yetishtirilgan mahsulotlarni Jahon savdo tashkilotiga a'zo davlatlarning bozorlariga kiritishda mavjud texnik to‘siqlarni bartaraf etish, ushbu jarayonga axborot texnologiyalarini joriy etish, kadrlar tayyorlash, xalqaro grantlar jalb qilish kabi masalalar ko‘rib chiqiladi.
Tadbir doirasida Ispaniya va Germaniya milliy qo‘mitalari bilan standartlashtirish sohasida o‘zaro hamkorlikni chuqurlashtirish, o‘zaro tajriba almashish va birgalikda standartlashtirish tizimini takomillashtirishga qaratilgan memorandumlar imzolanadi.
Ma'lumot uchun, Xalqaro elektrotexnika komissiyasi 1906-yil tashkil etilgan, bosh qarorgohi Jeneva shahrida (Shveysariya) joylashgan. Mazkur tashkilotga 180 ga yaqin davlat a'zo bo‘lgan. O‘zbekiston IEC faoliyatiga 2023-yilda qo‘shilgan. Mamlakatimizda Komissiya tomonidan elektrotexnika va energetika sohalarida joriy etilgan 11 mingta standartdan 1000 dan ortig‘i qabul qilingan.