Vazirlar Mahkamasi huzuridagi O'zbekiston texnik jihatdan tartibga solish agentligi

Muloqot davomida so‘nggi yillarda O‘zbekiston va Qozog‘iston o‘rtasida o‘zaro ishonch va hurmat tamoyillariga asoslangan do‘stona munosabatlar barcha sohalarda izchil rivojlanib, iqtisodiyotning turli sohalarida hamkorlik sezilarli darajada faollashgani, o‘zaro savdo hajmi ortib, qo‘shma loyihalar amalga oshirilayotganligi e’tirof etildi.

Uchrashuvda tomonlar 2024-yilda tovar ayirboshlash hajmi qariyb 4,3 milliard dollarga yetganligi, ayni paytda oziq-ovqat mahsulotlari, to‘qimachilik, rangli metallar, kimyo mahsulotlari va plastmassa buyumlari eksporti o‘sganligi shuningdek, O‘zbekiston va Qozog‘iston o‘rtasida 2030 yilgacha tovar ayirboshlash hajmini 10 milliard dollarga yetkazish bo‘yicha Dastur imzolanganligi munosabati bilan texnik jihatdan tartibga solish, savdodagi texnik to‘siqlarni bartaraf etish bo‘yicha kompleks chora-tadbirlar ko‘rishga tayyor ekanliklarini bildirdilar.

Milliy standartlarni xalqaro standartlar bilan uyg‘unlashtirish, Global sifat infratuzilmasi indeksi (GQII), xalqaro hamkorlik, ISOlutions, markirovka, texnik qo‘mitalar va quyi texnik qo‘mitalar faoliyatini takomillashtirish, standartlashtirish va muvofiqlikni baholash sohasida kadrlarni qayta tayyorlash va ularning malakasini oshirish  masalalari muhokama qilindi.

JSTga a’zo bo‘lish jarayonida milliy qonunchilikni JST bitim, qoida va me’yorlariga muvofiqlashtirish, mutaxassislarni institutsional salohiyatini mustahkamlash, ularning savdodagi texnik to‘siqlar sohasidagi bilim va ko‘nikmalarini oshirishga ham alohida e’tibor qaratildi.

Qozog‘iston standartlashtirish va metrologiya instituti hamda "O‘zbekiston ilmiy-sinov va sifat nazorati markazi" davlat muassasasi ("UzTest") o‘rtasida hamkorlikga qaratilgan chora-tadbirlar rejasi imzolandi.

Uchrashuv yakunlari bo‘yicha Qozog‘iston texnik jihatdan tartibga solish va metrologiya qo‘mitasi, Qozog‘iston standartlashtirish va metrologiya instituti vakillari bilan sohaga oid barcha yo‘nalishlarida keng ko‘lamli hamkorlikni rivojlantirishga kelishib olindi.

Ma’lumot uchun: Qozog‘iston  Global Quality Infrastructure Index (GQII) reytingida 168 ta mamlakat ichida 48-o‘rinni egallagan, bunda metrologiya yo‘nalishida - 46, standartlashtirish yo‘nalishida - 66,  akkreditatsiya yo‘nalishida - 28. Xalqaro standartlashtirish tashkilotida (ISO) 152 ta va Xalqaro Elektrotexnika Komissiyasi (IEC)da 3 ta texnik qo‘mita doimiy a’zosi.