Xalqaro ekspertlar ishtirokidagi trening-seminar amaliy muloqotlar ruhida davom etmoqda
2026-06-03 10:00:00 / Yangiliklar
🔵Toshkent shahrida Yevropa Ittifoqining TAIEX dasturi hamkorligida tashkil etilgan “Bozor nazorati: Yevropa tajribasi” mavzusidagi trening-seminar qizg‘in muhokamalar va amaliy muloqotlar ruhida davom etmoqda.
🔴Seminar doirasida davlat organlari mutaxassislari, tadbirkorlik subyektlari hamda soha vakillari tomonidan bozor nazoratiga oid dolzarb masalalar, amaliyotda uchrayotgan muammolar va ularni bartaraf etish mexanizmlari yuzasidan fikr almashilmoqda. Ishtirokchilar Yevropa Ittifoqida bozor nazoratini tashkil etish tamoyillari, amaldagi qonunchilik talablari, nazorat mexanizmlari hamda mahsulotlar xavfsizligini ta’minlash bo‘yicha ilg‘or tajribalar bilan yaqindan tanishmoqda.
🟢Tadbir davomida davlat va biznes vakillari o‘rtasida ochiq muloqot yo‘lga qo‘yilib, ishtirokchilarni qiziqtirgan ko‘plab savollarga xalqaro ekspertlar tomonidan batafsil javoblar berilmoqda. Bu esa bozor nazorati tizimini takomillashtirish, iste’molchilar manfaatlarini himoya qilish hamda xavfsiz mahsulotlar muomalasini ta’minlash borasidagi bilim va tajribalarni yanada boyitishga xizmat qilmoqda.
Shuningdek, mamlakatimizda fuqarolar salomatligi va iste’molchilar huquqlarini himoya qilishga qaratilgan muhim tashabbuslar haqida ham ma’lumot berildi. Xususan, nooziq-ovqat mahsulotlari xavfsizligini ta’minlash hamda ushbu sohadagi munosabatlarni tartibga solishga qaratilgan “Bozor nazorati to‘g‘risida”gi qonun loyihasi ishlab chiqilgani ta’kidlandi.
Trening-seminarni mazmunli va samarali tashkil etish maqsadida Yevropa Ittifoqidan xalqaro ekspertlar Morin Logge, Katajina Bednarz, Yan Dekonink hamda Tomash Yuzvyak jalb etilgan.
🩷Mazkur seminar bozor nazorati sohasida xalqaro tajribani o‘rganish, institutsional salohiyatni mustahkamlash va xavfsiz mahsulotlar bozorini shakllantirish yo‘lidagi muhim qadamlardan biri bo‘lib xizmat qilmoqda.