Vazirlar Mahkamasi huzuridagi O'zbekiston texnik jihatdan tartibga solish agentligi

🔵 20 may — Butunjahon metrologiya kuni munosabati bilan O‘zbekistonda ilk bor “Birlamchi nisbiy namlik birligi etaloni” laboratoriyasi faoliyati yo‘lga qo‘yildi. Laboratoriyaning tantanali ochilish marosimida Respublika Vazirlar Mahkamasi huzuridagi Texnik jihatdan tartibga solish agentligi direktori Akmal Jumanazarov hamda Toshkent irrigatsiya va qishloq xo‘jaligini mexanizatsiyalash muhandislari instituti milliy tadqiqot universiteti rektori Bahodir Mirzayev ishtirok etdi.

🔴 Mamlakatimizda metrologiya va standartlashtirish tizimini xalqaro talablarga moslashtirish, ishlab chiqarishda o‘lchashlar aniqligini ta’minlash borasida muhim qadam tashlandi. Innovatsion rivojlanish agentligi hamda O‘zbekiston texnik jihatdan tartibga solish agentligi hamkorligida “Birlamchi nisbiy namlik birligi etalonini yaratish” loyihasi muvaffaqiyatli amalga oshirildi.
 

🟤 Mazkur innovatsion loyiha natijasida O‘zbekiston milliy metrologiya institutida zamonaviy “Birlamchi nisbiy namlik birligi etaloni” laboratoriyasi o‘z faoliyatini boshladi.

🟡 Ushbu davlat etalonining ishga tushirilishi milliy iqtisodiyotning tayanch tarmoqlari bo‘lgan neft-gaz, kimyo, metallurgiya, farmatsevtika va tibbiyot kabi sohalarda namlik hamda shudring nuqtasini o‘lchash vositalarining yuqori aniqlikdagi metrologik kuzatuvchanligini to‘liq ta’minlaydi.

🔵 Eng muhimi, mazkur laboratoriya O‘zbekistonda o‘lchash natijalarining xalqaro miqyosda tan olinishiga xizmat qiladi hamda mamlakatimizga ushbu yo‘nalishdagi xalqaro solishtirishlarda faol ishtirok etish imkonini beradi. Bu esa mahalliy mahsulotlarning jahon bozoridagi raqobatbardoshligini oshirishda muhim omillardan biri bo‘ladi.