Mahsulot xavfsizligi va bozor nazoratini takomillashtirishga qaratilgan qonun loyihalari muhokama qilinmoqda
2026-05-07 10:00:00 / Yangiliklar
Oʻzbekiston texnik jihatdan tartibga solish agentligida Oʻzbekiston Respublikasi Oliy Majlisi Qonunchilik palatasi deputatlari ishtirokida “Texnik jihatdan tartibga solish agentligi faoliyati deputatlar nigohida” mavzusida seminar boʻlib oʻtmoqda.
Tadbir davomida mamlakatimizda mahsulot xavfsizligini taʼminlash, isteʼmolchilar huquqlarini himoya qilish hamda zamonaviy bozor mexanizmlarini joriy etishga qaratilgan “Mahsulotlarning umumiy xavfsizligi toʻgʻrisida” va “Bozor nazorati toʻgʻrisida”gi qonun loyihalarining mazmun-mohiyati, ahamiyati va kutilayotgan natijalari atroflicha muhokama qilinmoqda.
Taʼkidlanganidek, mazkur qonun loyihalari Oʻzbekiston Respublikasi Prezidentining 2025 yil 18 apreldagi PF–67-son Farmoni ijrosini taʼminlash, shuningdek tadbirkorlik muhitini yanada yaxshilash, mahsulotlarning bozorga kirishini yengillashtirish va ular ustidan samarali nazorat tizimini joriy etish vazifalari doirasida ishlab chiqilgan.
Seminarda bugungi global bozorda mahsulot turlarining ortib borayotgani, elektron tijoratning jadal rivojlanayotgani va yangi texnologiyalarning keng kirib kelishi mahsulot xavfsizligi hamda bozor nazorati tizimini takomillashtirishni talab etayotgani alohida qayd etildi. Shu nuqtai nazardan, qonun loyihalari xalqaro standartlar va ilgʻor xorijiy tajriba asosida tayyorlangani taʼkidlanmoqda.
“Mahsulotlarning umumiy xavfsizligi toʻgʻrisida”gi qonun loyihasi nooziq-ovqat mahsulotlari uchun yagona xavfsizlik talablarini belgilash, iqtisodiy operatorlarning majburiyatlarini aniqlashtirish, mahsulotlarni baholash va muvofiqlikni tasdiqlash tartiblarini takomillashtirish, shuningdek jiddiy xavf tugʻdiruvchi mahsulotlar boʻyicha tezkor ogohlantirish tizimini joriy etishni nazarda tutadi.
“Bozor nazorati toʻgʻrisida”gi qonun loyihasi esa mahsulotlar muomalaga kiritilganidan keyin ularning xavfsizligini taʼminlashga qaratilgan yangi bozor nazorati mexanizmlarini belgilaydi. Unda nazorat xaridlari, monitoring va ekspertiza kabi taʼsirchan usullarni joriy etish, xavfli mahsulotlarni bozordan chiqarish va chaqirib olish tartiblarini belgilash, shuningdek vakolatli organlar oʻrtasidagi hamkorlikni kuchaytirish masalalari nazarda tutilgan.
Tadbir doirasida deputatlar texnik jihatdan tartibga solish sohasida faoliyat yuritayotgan zamonaviy laboratoriyalar faoliyati bilan ham yaqindan tanishmoqdalar. Xususan, laboratoriyalarning moddiy-texnik bazasi, sinov va tadqiqot oʻtkazish imkoniyatlari hamda yangi talablar asosida ishlashga tayyorgarlik darajasi oʻrganilmoqda.
Mutaxassislar fikricha, mazkur qonun loyihalarining qabul qilinishi ichki bozorda xavfsiz mahsulotlar aylanishini taʼminlash, isteʼmolchilar huquqlarini ishonchli himoya qilish, tadbirkorlar uchun teng va shaffof raqobat muhitini yaratish hamda milliy qonunchilikni xalqaro talablarga yaqinlashtirishda muhim ahamiyat kasb etadi.