Vazirlar Mahkamasi huzuridagi O'zbekiston texnik jihatdan tartibga solish agentligi

✅ Texnik tartibga solish agentligi direktori Akmal Jumanazarov Favqulodda vaziyatlar vaziri o‘rinbosari, polkovnik Xurshid Sotiev hamda Favqulodda vaziyatlar vazirligi Yong‘in xavfsizligi va favqulodda vaziyatlar ilmiy-tadqiqot instituti boshlig‘i, polkovnik Sobir Djuraev bilan uchrashuv o‘tkazdi.

✅ Uchrashuv davomida texnik jihatdan tartibga solish va bozor nazorati tizimini yanada takomillashtirishga qaratilgan qator muhim masalalar atroflicha muhokama qilindi. Xususan:

🔵  bozor nazoratini muvofiqlashtirish Kengashi to‘g‘risidagi nizomni ishlab chiqish va tasdiqlash;
🔴  bozor nazoratini amalga oshiruvchi vakolatli davlat organlari faoliyatini samarali yo‘lga qo‘yish maqsadida ularni shtat birliklari bilan ta’minlash va moliyalashtirish mexanizmlarini shakllantirish;
🟢  qurilish inshootlari, materiallari va moddalarining yong‘in xavfini baholash, shuningdek yong‘inga qarshi hamda qutqaruv vositalarini sinovdan o‘tkazish uchun zamonaviy sinov laboratoriyalarini tashkil etish;
🟤  favqulodda vaziyatlar sohasida bozor nazorati mexanizmlarini joriy etish va yuqori malakali mutaxassislarni tayyorlash masalalari ko‘rib chiqildi.

✅ Mazkur yo‘nalishdagi ishlar O‘zbekiston Respublikasi Prezidentining 2026-yil 16-fevraldagi PF-25-son Farmoni bilan tasdiqlangan “Texnik jihatdan tartibga solish sohasini ilg‘or xorijiy tajriba asosida takomillashtirishga qaratilgan chora-tadbirlar dasturi”ga muvofiq amalga oshirilmoqda.

✅ Ushbu farmonga ko‘ra, O‘zbekiston texnik jihatdan tartibga solish agentligiga bozor nazoratini muvofiqlashtirish Kengashini tashkil etish, shuningdek bozor nazoratini amalga oshiruvchi vakolatli davlat organlari faoliyatini yo‘lga qo‘yishni nazarda tutuvchi normativ-huquqiy hujjat loyihasini ishlab chiqish vazifasi yuklatilgan.

✅ Uchrashuv yakunida tomonlar mazkur yo‘nalishlarda o‘zaro hamkorlikni yanada mustahkamlash, belgilangan vazifalarni izchil va samarali amalga oshirish bo‘yicha kelishib oldilar.