Vazirlar Mahkamasi huzuridagi O'zbekiston texnik jihatdan tartibga solish agentligi

✅ O‘zbekiston texnik jihatdan tartibga solish agentligi direktori Akmal Jumanazarov Samarqand shahrida joylashgan qator sanoat korxonalari faoliyati bilan yaqindan tanishdi.

✅ Jumladan, “SAM RAFOAT TEKSTIL” MChJda eksportga yo‘naltirilgan sochiq va xalat mahsulotlari hamda baxmal mato ishlab chiqarish uchun rejalashtirilayotgan yangi ishlab chiqarish binosi ko‘zdan kechirildi. Muloqotlar davomida mahsulotlar eksport geografiyasini kengaytirish, xususan, Yevropa Ittifoqi bozoriga chiqish imkoniyatlari muhokama qilindi.

✅ Shuningdek, “Zarafshon Tekstil” MChJda tayyor kiyim-kechak mahsulotlari ishlab chiqarish jarayonlari bilan tanishildi. Uchrashuv davomida Yevropa Ittifoqi davlatlariga eksport hajmini oshirish hamda korxonada xalqaro standartlarni joriy etish masalalari ko‘rib chiqildi.

✅ “AZIYA - STEEL PROM” MChJda po‘lat quvurlar, quvur o‘tkazgichlar, profillar va fittinglar ishlab chiqarish jarayonlari o‘rganildi. Korxona rahbariyati bilan bo‘lib o‘tgan muloqotlarda eksport salohiyatini oshirish, Yevropa bozoriga chiqish, xalqaro standartlarni joriy etish hamda davlat tomonidan taqdim etilayotgan imtiyozlardan samarali foydalanish masalalari muhokama qilindi.

✅ Yakunlariga ko‘ra, Akmal Jumanazarov tomonidan korxonalar rahbarlariga mahsulotlar sifatini xalqaro talablar darajasiga olib chiqish, texnik jihatdan tartibga solish va standartlashtirish tizimlarini takomillashtirish bo‘yicha tavsiyalar berildi. Shuningdek, Yevropa Ittifoqi bozoriga chiqishda texnik to‘siqlarni bartaraf etish va xalqaro sertifikatlashtirish jarayonlarini jadallashtirish yuzasidan tushuntirish ishlari olib borildi.