O‘zbekiston va Hindiston o‘rtasida texnik hamkorlikni kengaytirish masalalari muhokama
2026-03-12 11:05:00 / Yangiliklar
O‘zbekiston Texnik jihatdan tartibga solish agentligi direktori A. Jumanazarov Hindiston Respublikasining O‘zbekistondagi Favqulodda va Muxtor Elchisi Smita Pant bilan uchrashuv o‘tkazdi.
Uchrashuv O‘zbekiston Respublikasi Tashqi ishlar vazirligi hamkorligida tashkil etilib, unda texnik jihatdan tartibga solish, standartlashtirish, metrologiya hamda muvofiqlikni baholash sohalarida hamkorlikni rivojlantirish masalalari muhokama qilindi.
Tomonlar ikki mamlakat o‘rtasida savdo-iqtisodiy aloqalar izchil rivojlanib borayotganini ta’kidlab, ushbu jarayonda texnik tartibga solish tizimini takomillashtirish muhim ahamiyat kasb etishini qayd etdilar. Xususan, o‘zaro savdo hajmini oshirish, savdodagi texnik to‘siqlarni kamaytirish hamda tadbirkorlik subyektlari uchun yanada qulay sharoitlar yaratish masalalari muhokama markazida bo‘ldi.
Shuningdek, muvofiqlikni baholash natijalarini o‘zaro tan olish bo‘yicha hukumatlararo bitim loyihasini ishlab chiqish imkoniyatlari ko‘rib chiqildi. Bu esa mahsulotlarning ikki davlat bozorlariga chiqishini yanada osonlashtirishga xizmat qilishi ta’kidlandi.
Uchrashuv davomida Hindiston Standartlar byurosi (BIS) bilan hamkorlikni mustahkamlash, yangi qo‘shma loyihalarni amalga oshirish hamda malakali kadrlar tayyorlash masalalariga ham alohida e’tibor qaratildi. Xususan, ITEC (Indian Technical and Economic Cooperation) dasturi doirasida o‘quv va malaka oshirish loyihalarini kengaytirish bo‘yicha takliflar bildirildi.
Uchrashuv yakunida tomonlar O‘zbekiston va Hindiston o‘rtasida texnik tartibga solish sohasidagi hamkorlikni yanada rivojlantirish va yangi yo‘nalishlarda qo‘shma tashabbuslarni qo‘llab-quvvatlashga tayyor ekanliklarini bildirdilar.