AQSh Xalqaro savdo ma’muriyati va AQSh Savdo vakili ofisi mas'ullari bilan uchrashuv
2026-01-23 10:05:00 / Yangiliklar
Vashington shahrida O‘zbekiston Texnik jihatdan tartibga solish agentligi hamda AQSh Xalqaro savdo ma’muriyati (ITA) va AQSh Savdo vakili ofisi (USTR) vakillari ishtirokida uchrashuv bo‘lib o‘tdi.
Amerika Milliy standartlar instituti (ANSI) va O‘zbekistonning AQShdagi elchixonasi hamkorligida tashkil etilgan uchrashuvda savdodagi texnik to‘siqlarni bartaraf etish, standartlashtirish sohasida hamkorlikni kengaytirish, malakali mutaxassislar tayyorlash, shuningdek grant va texnik ko‘maklarni jalb etish masalalari muhokama qilindi.
Uchrashuvda 2025-yil sentabr oyida BMT Bosh Assambleyasining 80-yubiley sessiyasi doirasida davlatimiz rahbari va AQSh yetakchisi o‘rtasida bo‘lib o‘tgan muzokaralar, shuningdek “C5+1” sammiti doirasidagi uchrashuvlar ikki va ko‘p tomonlama amaliy loyihalarni jadallashtirishga xizmat qilayotgani ta’kidlandi.
AQSh tomoni O‘zbekistonda standartlashtirish va texnik jihatdan tartibga solish sohasida amalga oshirilayotgan islohotlarni yuqori baholab, milliy standartlarning xalqaro standartlar bilan uyg‘unlashuv darajasi oshgani, milliy qonunchilik JST bitimlari va me’yorlariga muvofiqlashtirilayotgani, sohada raqamlashtirish ishlari jadal olib borilayotgani, shuningdek “Bozor nazorati to‘g‘risida” hamda “Mahsulotlarning umumiy xavfsizligi to‘g‘risida”gi qonun loyihalari ishlab chiqilganini ijobiy qadam sifatida qayd etdi.
Uchrashuv yakunida AQShning sifat infratuzilmasi idoralari bilan amaliy hamkorlikni yanada kengaytirish, savdodagi texnik to‘siqlarni bartaraf etish bo‘yicha mutaxassislar tayyorlash, shuningdek AQSh bozoriga chiqish talablari bo‘yicha trening va seminarlar tashkil etish yuzasidan kelishuvga erishildi.