Qashqadaryoda sport maktablari faoliyatini yangi tizim asosida tashkil etish masalalari muhokama qilindi
2026-08-04 12:00:00 / Yangiliklar
Qashqadaryo viloyatida Vazirlar Mahkamasining “Sport maktablari faoliyatini tizimli tashkil etishning qo‘shimcha chora-tadbirlari to‘g‘risida”gi qarori mazmun-mohiyatiga bag‘ishlangan taqdimot o‘tkazildi.
Unda Sport vazirligi bo‘lim boshlig‘i Sherzod Olimov, Qashqadaryo viloyati sport boshqarmasi boshlig‘i Vahob Ro‘ziyev, boshqarma mas’ullari, hududlardagi sport maktablari direktorlari, trener-seleksionerlar hamda soha mutaxassislari ishtirok etdi.
Taqdimot davomida qaror asosida sport maktablari faoliyatiga joriy etilayotgan yangi tartib va mexanizmlar haqida batafsil ma’lumot berildi.
Xususan, 2026-yil 1-sentabrdan boshlab sport maktablarini hududlarning real ehtiyoji, aholining sport turlariga qiziqishi, mavjud infratuzilma, trenerlar salohiyati hamda sportchilarning natijalaridan kelib chiqib ixtisoslashtirish va ushbu jarayonni har yili qayta baholab borish belgilanganligi ta’kidlandi.
Shuningdek, ommaviy sport bilan shug‘ullanuvchilar qamrovini kengaytirish, iqtidorli yoshlarni aniqlash va saralashning yagona tizimini joriy etish, sport maktablari xodimlarini natijadorlik asosida rag‘batlantirish hamda ustamalarni hisoblashning yangi mezonlarini amaliyotga tatbiq etish masalalari muhokama qilindi.
Tadbirda sport sohasini raqamlashtirishga doir vazifalarga ham alohida e’tibor qaratildi. Jumladan, ERP Sport axborot tizimi orqali sportchilar, trenerlar va mashg‘ulotlar hisobini to‘liq raqamlashtirish, ommaviy sport ko‘rsatkichlarini elektron tizim asosida baholash hamda mahallalarda faoliyat yuritayotgan o‘zini o‘zi band qilgan trenerlarni davlat sport tizimiga integratsiya qilish bo‘yicha belgilangan vazifalar tushuntirildi.
Taqdimot yakunida qaror ijrosini Qashqadaryo viloyatida samarali tashkil etish, belgilangan vazifalarni o‘z vaqtida va sifatli amalga oshirish bo‘yicha ishtirokchilarning savollariga javob berildi hamda amaliy tavsiyalar taqdim etildi.