Sport sohasida ilmiy tadqiqotlarni amaliyotga joriy etishning yangi tizimi yo‘lga qo‘yiladi
2026-07-30 09:00:00 / Yangiliklar
O‘zbekiston Respublikasi Sport vazirining 2026-yil 16-iyuldagi 01/495-A/F-son buyrug‘i bilan jismoniy tarbiya va sport sohasidagi ilmiy ishlar natijalarini to‘g‘ridan-to‘g‘ri amaliyotga joriy etish imkoniyatlarini kengaytirishga qaratilgan yangi mexanizm joriy etildi.
Mazkur buyruqqa muvofiq:
🔹 sport sohasidagi eng dolzarb muammolar yechimiga qaratilgan ilmiy tadqiqot mavzulariga oldindan buyurtma berish amaliyoti yo‘lga qo‘yiladi;
🔹 sport turlari bo‘yicha PhD va DSc ilmiy ishlarining mavzulari tasdiqlanadi hamda tadqiqotlar amaliy ehtiyojlardan kelib chiqib shakllantiriladi;
🔹 ilmiy tadqiqot natijalari Sport vazirligi tizimidagi sport-ta’lim muassasalari bazalarida sinovdan o‘tkazilib, trenerlar va mutaxassislarning takliflari asosida takomillashtirib boriladi;
🔹 tadqiqotlar asosida yaratilgan qo‘llanma va metodikalar sport-ta’lim tashkilotlari o‘quv dasturlariga bosqichma-bosqich joriy etiladi.
Shuningdek, buyruq bilan:
✅ Milliy olimpiya va paralimpiya qo‘mitalari hamda sport federatsiyalari tomonidan har yili sport sohasining dolzarb muammolari bo‘yicha ilmiy mavzular shakllantirilishi;
✅ "ERP Sport" yagona elektron boshqaruv tizimida ilmiy mavzularni tanlash va boshqarish bo‘yicha maxsus modul ishlab chiqilishi;
✅ ilmiy izlanuvchilar tomonidan tanlangan mavzularning takrorlanishiga yo‘l qo‘yilmasligi belgilandi.