Sport vaziri AQSHlik fizioterapiya va jismoniy mashqlar fiziologiyasi yo‘nalishidagi yetakchi olimlar bilan uchrashuv o‘tkazdi
2026-04-02 18:00:00 / Yangiliklar
Bugun Sport vaziri Adkham Ikramov O‘zbekiston davlat jismoniy tarbiya va sport universitetiga tashrifi davomida ayni kunlarda universitetda bo‘lib turgan AQSHlik fizioterapiya va jismoniy mashqlar fiziologiyasi yo‘nalishidagi yetakchi olimlar — Brayan Xants va Skott Uord bilan uchrashuv o‘tkazdi.
Unda sportchilar organizmiga tushadigan yuklamani baholash va yurak ritmini tahlil qilish, yuqori malakali sportchilarning tiklanish jarayonlarini optimallashtirish hamda chidamlilikni oshirish usullarini tadqiq etish, yurak ritmi variabelligi (HRV)ni jismoniy yuklamalarga moslashuvning asosiy ko‘rsatkichi sifatida o‘rganish, shuningdek, yurtimizda fizioterapiya sohasini yanada rivojlantirishga oid dolzarb masalalar muhokama qilindi.
Shundan so‘ng vazir universitetda ilmiy ishlanmalar va innovatsion texnologiyalarni sohaga qo‘llash borasida olib borilayotgan ishlar, talabalarga yaratilgan sharoitlar bilan batafsil tanishdi. Xususan, talabalar bilim va ko‘nikmalarini oshirishga qaratilgan bepul turk va koreys tili markazlari faoliyati, ularning o‘quv dasturlari va ishtirokchilar uchun yaratilgan imkoniyatlar ko‘zdan kechirildi.