Oʻzbekiston Respublikasi Transport vazirligi

Xususan, vazirlik huzuridagi Jamoatchilik kengashi raisi S.Xodjayeva hamda Xorazm viloyati Nogironlar jamiyati raisi S.Qurbonova boshchiligidagi ishchi guruh Urganch shahrida jamoat transporti tizimini rivojlantirish, aholi uchun qulay va xavfsiz bo‘lgan tashuv xizmatlarini tashkil etish, nogironligi bo‘lgan yo‘lovchilarning shahar jamoat transporti (avtobuslar)dan foydalanishi uchun yaratilgan sharoitlar, ushbu shaxslar huquqlariga rioya etilishini ta’minlash holati yuzasidan monitoring tadbirlarini olib bordi.

Dastlab, Jamoatchilik kengashi a’zolari Xorazm viloyati transport boshqarmasida bo‘lib, Urganch shahri va viloyat hududida jamoat transporti tizimini rivojlantirish borasida amalga oshirilayotgan ishlar va kelgusidagi rejalar bilan yaqindan tanishdi. Davlatimiz rahbarining 2023-yil 16-fevraldagi PQ–59-son qarorida belgilangan vazifalar ijrosi doirasida Urganch shahrida aholiga sifatli jamoat transporti xizmati ko‘rsatishni yo‘lga qo‘yish bo‘yicha tegishli choralar ko‘rilmoqda.

2024-yilda aholiga qulay transport xizmatlari ko‘rsatishni tashkil etish maqsadida Xitoydan 80 dona zamonaviy past polli avtobuslar olib kelindi. Ushbu harakat tarkiblari shahardagi 6 ta avtobus yo‘nalishlariga joylashtirildi va brutto shartnomasi asosida yo‘lovchilarga xizmat ko‘rsatishni boshladi. Shahar bo‘ylab, 5,5 km masofada avtobuslarning to‘siqsiz harakatlanishlari uchun alohida yo‘laklar tashkil etildi. Avtobuslar oraliq intervali ikki barobarga ya’ni 10-15 daqiqadan 5-8 daqiqaga qisqartirildi. Elektron usulda to‘lovlarni amalga oshiruvchi yo‘lovchilarga yo‘l haqidan chegirmalar taqdim etilishi yo‘lga qo‘yildi. Natijada aholining jamoat transportidan foydalanish darajasi o‘rtacha 26 % dan 38 % ga yetkazildi.

Jamoatchilik kengashi vakillari shu yerda markazlashgan dispetcherlik xizmati faoliyati bilan yaqindan tanishib, brutto-shartnomasi asosida yo‘nalishlarga biriktirilgan avtobuslarning bosib o‘tilgan yo‘l va sifat mezonlari bo‘yicha baholanishi yuzasidan “Xorazm yo‘lovchi tashishni monitoring va nazorat qilish” DM mutasaddilaridan batafsil javob oldi. 

Shuningdek, Jamoatchilik kengashi a’zolari transport infratuzilma obyektlari, avtobuslar oraliq bekatlari holati bilan tanishib, sohada amalga oshirilayotgan o‘zgarishlar yuzasidan aholi fikri bilan qiziqdi.