Oʻzbekiston Respublikasi Transport vazirligi

Transport vazirligi huzuridagi Jamoatchilik kengashi a’zolari ushbu yo‘nalishda Qashqadaryo viloyatida amalga oshirilayotgan ishlar holati bilan yaqindan tanishish maqsadida viloyat transport boshqarmasida bo‘ldi. Boshqarma mutasaddilari ishtirokida viloyatda jamoat transporti tizimini rivojlantirish borasida olib borilayotgan ishlar, “Jamoat transporti tizimini isloh qilish chora-tadbirlari to‘g‘risida”gi PQ–59-sonli qarorda belgilangan vazifalar ijrosi muhokama etildi.  

Mutaxassislar qaror ijrosi doirasida ishlab chiqilgan “Qarshi shahri transport va yo‘l-transport infratuzilmasini rivojlantirish Bosh rejasi” ga muvofiq bajarilgan ishlar va kelgusidagi rejalar yuzasidan batafsil ma’lumot berishdi.

Bosh rejaga muvofiq Qarshi shahrida yo‘nalishlar tarmog‘i qayta shakllantirilib, 21 ta shahar avtobus yo‘nalishi tashkil etildi. Mazkur yo‘nalishlarda qatnovlar brutto-shartnomasi asosida tashkil etilmoqda. Hozirda 8 ta yo‘nalishda qatnovlar ushbu yangi tizim orqali yo‘lga qo‘yilgan. Yo‘nalishlarda jami 96 ta zamonaviy  avtobus yo‘lovchilarga munosib xizmat ko‘rsatmoqda. Bugun ushbu sohada ro‘y berayotgan o‘zgarishlar hudud aholisi turmushida aks etib, odamlar jamoat transporti qulayliklaridan kundalik hayotda foydalanyapti.

Kengash a’zolari transport boshqarmasi huzurida tashkil etilgan “Yo‘lovchi tashishni monitoring va nazorat qilish” Davlat muassasasi hamda “Avtomatlashtirilgan dispetcherlik xizmati” faoliyati bilan ham yaqindan tanishdi.

Shuningdek, jamoat transporti xizmatlari ko‘rsatishda moliyalashtirishning yangi brutto-shartnoma tizimiga o‘tilishi natijasida xizmat sifati qay darajada ortgani, yo‘lovchi tashish sohasida faoliyat ko‘rsatuvchi tadbirkorlar va aholining ushbu tizim yuzasidan fikrlari o‘rganildi.   

Jamoatchilik kengashi a’zolari tomonidan Qarshi va Shahrisabz shaharlarida transport infratuzilmasini rivojlantirish, inklyuziv transport  tizimini barpo etish borasidagi ishlar holati monitoring qilindi.