Oʻzbekiston Respublikasi Transport vazirligi

Dastlab, Jamoatchilik kengashi a’zolari Qashqadaryo viloyati hokimi Murotjon Azimov qabulida bo‘lib, hududda jamoat transporti tizimi va infratuzilmasini rivojlantirish, aholiga qulay va xavfsiz tashuv xizmatlari ko‘rsatishni tashkil etish borasida amalga oshirilayotgan ishlar va kelgusidagi rejalarni muhokama etishdi.      

Davlatimiz rahbarining 2023-yil 16-fevraldagi “Jamoat transporti tizimini isloh qilish chora-tadbirlari to‘g‘risida”gi PQ–59 son qarorida belgilangan vazifalar ijrosi doirasida bugun Qashqadaryo viloyatida ham qator ishlar amalga oshirilmoqda. Xususan, hududda jamoat transporti qamrovini kengaytirish, maqsadida “Qarshi shahri transport va yo‘l-transport infratuzilmasini rivojlantirish Bosh rejasi” ishlab chiqildi va Xalq Deputatlari viloyat Kengashi tomonidan tasdiqlandi.  

Bosh rejaga muvofiq yo‘nalishlar tarmog‘i qayta shakllantirilib, 21 ta shahar avtobus yo‘nalishi tashkil etildi. Mazkur yo‘nalishlarda qatnovlar brutto-shartnomasi asosida tashkil etilmoqda. Hozirda 8 ta yo‘nalishda qatnovlar ushbu yangi tizim orqali yo‘lga qo‘yilgan. Yo‘nalishlarda jami 96 ta zamonaviy  avtobus yo‘lovchilarga munosib xizmat ko‘rsatmoqda. Yil yakuniga qadar yana 2 ta yo‘nalishda brutto shartnomasi asosida qatnovlar yo‘lga qo‘yiladi.

Viloyatda yo‘lovchi tashish faoliyati bilan shug‘ullanuvchi tadbirkorlar tomonidan 2024-yilda 58 dona, 2025-yil boshidan boshidan buyon esa 26 ta zamonaviy avtobuslar xarid qilindi. Yil yakuniga qadar yana 30 ta zamonaviy avtobuslar olib kelinishi rejalashtirilgan.

Shuningdek, Vazirlar Mahkamasining 2024-yil 14-noyabrdagi “Hududlarda jamoat transport infratuzilmasini rivojlantirishga doir qo‘shimcha chora-tadbirlar to‘g‘risida”gi 757-son qarori bilan tasdiqlangan “Shaharlar va boshqa aholi punktlarining ko‘chalarida mahalliy byudjet mablag‘lari hisobidan avtobus bekatlarini qurish, rekonstruksiya qilish va jihozlash Dasturi”ga muvofiq joriy yilda Qashqadaryo viloyatida jami 48 ta avtobus oraliq bekatlari qurildi va rekonstruksiya qilindi.

Viloyat hokimi Murotjon Azimov hudud aholisi turmush farovonligini yuksaltirish borasida mazkur yo‘nalishdagi ishlar izchil davom ettirilishini ta’kidlab o‘tdi. Joylarda ushbu yo‘nalishdagi islohotlarning tizimli amalga oshirilishi ustidan jamoatchilik nazoratini o‘rnatish, yuzaga kelayotgan muammolarni o‘rganib yechimi bo‘yicha takliflar ishlab chiqish, pirovardida hududni ham iqtisodiy, ham ijtimoiy rivojlantirishda muhim ahamiyatga ega ekanligini qayd etdi.

Shundan so‘ng, Jamoatchilik kengashi a’zolari Qarshi shahri jamoat transporti tizimi va infratuzilmasi, avtobuslar harakati, yangidan qurilgan oraliq bekatlari holatini joyiga chiqib o‘rganib, sohada amalga oshirilayotgan islohotlar yuzasidan aholi fikrini o‘rgandi.