Oʻzbekiston Respublikasi Transport vazirligi

Mamlakatimiz bo‘ylab kelib tushgan 1 300 dan ortiq tashabbuslar orasidan saralanib, “TOP-10” ro‘yxatiga kiritilgan ushbu loyiha shaxsan davlatimiz rahbari tomonidan tahlil qilinib, yuksak e’tirof etildi hamda muallifga maxsus sertifikat va pul mukofoti topshirildi. 

Oyshaxon Qodirova tomonidan Davlatimiz rahbariga taqdimot qilingan ushbu “Bionik ko‘chat ekish” loyihasi qishloq xo‘jaligida inson mehnatini yengillashtirish va ish unumdorligini keskin oshirishga qaratilgan. 

Loyihaga ko‘ra, avtomat rejimda ishlovchi mini-traktor bir vaqtning o‘zida yerni tekislash, chuqur qazish, ozuqa tashlash, suv quyish hamda ko‘chat ekish funksiyalarini to‘liq bajaradi. Xorijiy muqobillaridan bir necha barobar arzon bo‘lgan ushbu uskuna yordamida ko‘chatlarning nobud bo‘lish xavfi kamayib, ish samaradorligi 4-5 barobarga ortishi kutilmoqda. 

Prezidentimizga qilingan muvaffaqiyatli taqdimotdan so‘ng, ushbu istiqbolli loyihani hayotga tatbiq etishning amaliy mexanizmlari qat’iy belgilab berildi. Umumiy qiymati 300 million so‘mga baholangan ushbu tashabbus Qishloq xo‘jaligi vazirligi bilan hamkorlikda tajriba-sinovdan o‘tkazilib, kelgusida to‘liq tijoratlashtiriladi. 

Transport universiteti yoshlarining davlat miqyosidagi eng nufuzli minbarlarda, shaxsan Yurtboshimizga o‘z ilmiy yechimlarini dadil taqdim etayotgani va amaliy qo‘llab-quvvatlovga erishayotgani oliygoh tayyorlayotgan muhandis kadrlarning yuksak salohiyatidan dalolat beradi.