Oʻzbekiston Respublikasi Transport vazirligi

Mazkur uchrashuvda kasbiy ta’lim muassasalarida “TEXVET II” loyihasini samarali yo‘lga qo‘yish maqsadida Toshkent transport texnikumi direktori ham faol ishtirok etdi.

Uchrashuvda O‘zbekiston Respublikasi Transport vazirining yo‘l xo‘jaligi sohasida ilmiy ishlar va innovatsiyalar bo‘yicha yordamchisi Kamola Iriskulova, Vazirlikning Ta’lim muassasalari faoliyatini muvofiqlashtirish bo‘linmasi bosh mutaxassisi Lobar Ulmasova, “Temiryo‘linfratuzilma” AJ Personalni tayyorlash muassasasi boshlig‘i Kamol Jo‘raboyev, “Temir yo‘l kasbiy malaka” MChJ direktori Sh. Ibragimov hamda GIZ tashkilotining loyiha menejeri Matthias Klinenberg va milliy koordinatori Yelena Sabirovalar ishtirok etdilar.

Uchrashuv davomida tomonlar o‘zlariga yuklatilgan vazifalarni muhokama qilib, kelgusida amalga oshiriladigan ustuvor qadamlar yuzasidan o‘zaro kelishuvlarga erishdilar.

Jumladan, temir yo‘l transporti sohalarini chuqur o‘rganish, bugungi mehnat bozori talablariga mos zamonaviy va istiqbolli kasblar ro‘yxatini shakllantirish hamda ushbu kasblar yuzasidan kasbiy standartlar, malaka talablari va boshqa o‘quv-me’yoriy hujjatlarni ishlab chiqish masalalari belgilab olindi.

“TEXVET II” loyihasi O‘zbekiston kasbiy ta’lim tizimini xalqaro standartlar asosida rivojlantirish, dual ta’lim imkoniyatlarini kengaytirish va ishlab chiqarish bilan integratsiyalashgan amaliy ta’limni yangi bosqichga olib chiqishga xizmat qiladi.