Oʻzbekiston Respublikasi Transport vazirligi

Qarorga muvofiq 2026-yil 1-iyundan boshlab, quyidagi tartib joriy etiladi:
 

avtomobilda yuk va yo‘lovchilarni xalqaro tashishga xorijiy yoki ko‘p tomonlama ruxsatnomalarni chegara bojxona postlarida chiqish yo‘nalishida harakatlanayotgan avtotransport vositasiga xalqaro tashish yo‘nalishi bo‘yicha berish amaliyoti yo‘lga qo‘yiladi;

 
xalqaro yo‘nalishlarda qatnovni rejalashtirish uchun avtotransport vositasiga yuk ortishdan oldin milliy tashuvchilarga Transport vazirligining avtomatlashtirilgan axborot tizimida zarur bo‘lgan barcha xorijiy yoki ko‘p tomonlama ruxsatnomalarni 10 kun muddatga band qilish imkoniyati yaratiladi;
 

xorijiy yoki ko‘p tomonlama ruxsatnomalarni milliy tashuvchilarga berish, qabul qilish, saqlash va axborot tizimida qayd etish uchun chegara bojxona postlarida ruxsatnomalarni berish punktlari tashkil etiladi;
 

o‘tgan hisobot yilida milliy tashuvchilarning yuk va yo‘lovchi tashish geografiyasidan kelib chiqqan holda xorijiy davlatlar kesimida xalqaro tashish yo‘nalishlari ro‘yxati Transport vazirligi tomonidan shakllantiriladi;
 

ruxsatnomalarni berish punktlari va xalqaro tashish yo‘nalishlari ro‘yxatlari hamda xorijiy davlatlar kesimida xalqaro tashish turi bo‘yicha tanqis bo‘lgan xorijiy yoki ko‘p tomonlama ruxsatnomalar to‘g‘risidagi ma’lumotlar axborot tizimida e’lon qilib boriladi.

Qaror bilan “Avtomobilda yuk va yo‘lovchilarni xalqaro tashishga ruxsatnomalarni ayirboshlash, berish va ulardan foydalanish tartibi to‘g‘risida”gi nizom tasdiqlandi.

Ushbu Nizom avtomobilda yuk va yo‘lovchilarni xalqaro tashishga ruxsatnomalarni ayirboshlash, berish va ulardan foydalanish tartibini belgilaydi.

Mazkur Nizomning amal qilishi milliy va xorijiy tashuvchilarga tatbiq etiladi.

Nizomga ko‘ra, O‘zbekiston ruxsatnomalarida avtomobilda yuk va yo‘lovchilarni xalqaro tashish turlari va ulardan foydalanish shartlari ko‘rsatiladi.

O‘zbekiston va xorijiy ruxsatnomalar quyidagi asosiy turlarga bo‘linadi:

▫️ ikki tomonlama/tranzit yuk tashish uchun;
▫️ uchinchi davlatga/dan yuk tashish uchun;
▫️ universal (ikki tomonlama, tranzit va uchinchi davlatga/dan yuk tashish);
▫️ ikki tomonlama yuk tashish uchun;
▫️ tranzit yuk tashish uchun;
▫️ ikki tomonlama qatnovlarda yo‘lovchilarni nomuntazam tashish uchun;
▫️ tranzit qatnovlarda yo‘lovchilarni nomuntazam tashish uchun.

Avtomobilda yo‘lovchilarni xalqaro muntazam tashishlar O‘zbekiston Respublikasi va xorijiy davlatning vakolatli organlari o‘rtasidagi kelishuv bo‘yicha tashkil etiladi.