Oʻzbekiston Respublikasi Transport vazirligi

Forum O‘zbekiston transport vaziri Ilhom Maxkamov va Xalqaro transport forumi (ITF) bosh kotibi Yong-tae Kimning qutlov so‘zlari bilan ochildi. Panel sessiyalari davomida ishtirokchilar aviatsiya bozoridagi  asosiy tendensiyalar va muammolar, infratuzilmani rivojlantirish, havo qatnovlari samaradorligini oshirish va innovatsion texnologiyalarni joriy etish masalalarini muhokama qilishdi. Ushbu forumda  "Boeing", "Airbus", "TAV Technologies", "Vision Invest", "Sojitz Corporation", "Uzbekistan Airways", "Uzbekistan Airports", "Turkish Airlines", "Pegasus Airlines" va boshqa kompaniyalari o‘z ma’ruzalari bilan ishtirok etishdi.

"Uzbekistan Airports" kompaniyasi boshqaruvi raisi Javlonbek Umarxodjayev o‘z nutqida aeroport infratuzilmasini modernizatsiya qilish, ekologik toza va energiya tejamkor texnologiyalarni hamda yo‘lovchilar qulayligi va xavfsizligini oshiradigan raqamli yechimlarni joriy etish bo‘yicha amalga oshirilayotgan keng ko‘lamli ishlar haqida so‘z yuritdi. U aeroportlarni rivojlantirish O‘zbekistonning barqaror transport o‘sish strategiyasining ajralmas qismi ekanligini va mamlakatning tranzit salohiyatini mustahkamlashda muhim rol o‘ynashini ta’kidladi.

Tadbirda parvozlar xavfsizligini boshqarish, aviatsiya jarayonlarini raqamlashtirish, aviatsiya va turizm o‘rtasidagi munosabatlar va inson kapitalini rivojlantirishga — soha uchun yangi avlod mutaxassislarini tayyorlashga alohida e’tibor qaratildi.

Forum doirasida Iqtisodiy hamkorlik tashkiloti (IHT) a’zo davlatlar milliy aviakompaniyalari forumi ham bo‘lib o‘tdi, unda fuqaro aviatsiyasidagi islohotlar, xususiy aviatsiyani rivojlantirish istiqbollari, barqaror rivojlanish va ekologik toza texnologiyalarni joriy etish masalalari muhokama qilindi. Tadbir IHTning Fuqaro aviatsiyasi bo‘yicha ishchi guruhining yig‘ilishi bilan yakunlandi.