Koreyada mavsumiy ish bo‘yicha yangi kelishuv!
2026-01-27 19:00:00 / Yangiliklar
Koreya Respublikasining Jeollabuk-do viloyati, Buan okrugi hokimiyatida okrug hokimi janob Kweon Ig-hyeon, Migratsiya agentligining Koreyadagi Vakolatxonasi rahbariyati hamda Andijon viloyati vakillari ishtirokida uchrashuv bo‘lib o‘tdi.
🖋 Unda Jeollabuk-do viloyatida (Buan) qishloq xo‘jaligi sohasida mavsumiy ishchi kuchiga bo‘lgan ehtiyojni qoplash maqsadida Andijon viloyati bilan kelishuv imzolandi. (Koreya Adliya vazirligi talabiga ko‘ra, bunday kelishuvlarda ishchi kuchini yuboruvchi va qabul qiluvchi hududlar aniq belgilanishi shart).
📌 Kelishuvda quyidagi yo‘nalishlar qamrab olindi:
▪️ mavsumiy ishchilarni jalb qilish va boshqarishda hamkorlik;
▪️ noqonuniy qolib ketish holatlarining oldini olish;
▪️ mehnat shartlari va migratsiya qoidalariga rioya etish.
🗣 Koreya tomoni ta’kidlaganidek, ushbu kelishuv ikki davlat o‘rtasidagi o‘zaro ishonchni mustahkamlab, qishloq xo‘jaligi sohasida qonuniy va barqaror mehnat tizimini shakllantirishga xizmat qiladi.
📰 Ushbu xabarning Koreya ommaviy axborot vositalarida keng yoritilayotgani — O‘zbekiston bilan mehnat migratsiyasi sohasidagi hamkorlikka bo‘lgan ishonch ortib borayotganini ko‘rsatadi.
👷♂️ Koreyaning yetakchi nashrlarida esa: “Ayniqsa, davlat tomonidan boshqariladigan mavsumiy mehnat tizimi ish beruvchilar uchun kadrlar bilan bog‘liq tashkiliy yukni kamaytirib, ishchilarning mehnat va yashash sharoitlarini barqarorlashtirish imkonini beradi”, — deya ta’kidlanmoqda.