Tashqi mehnat migratsiyasi bo‘yicha aniq vazifalar
2026-01-16 10:45:00 / Yangiliklar
Prezident Shavkat Mirziyoyev raisligida Tashqi ishlar vazirligi hamda xorijdagi diplomatik vakolatxonalar rahbarlari ishtirokida videoselektor yig‘ilishi bo‘lib o‘tdi.
Yig‘ilishda tashqi mehnat migratsiyasini tizimli yo‘lga qo‘yish, fuqarolarimizni xorijda yuqori daromadli va qonuniy ish o‘rinlariga yo‘naltirish bo‘yicha ishlash hudud rahbarlari va O‘zbekistonning chet mamlakatlardagi diplomatik vakolatxonalarining asosiy vazifalardan etib belgilandi:
1. Xorijda ish o‘rinlarini kengaytirish
Bugungi kunda O‘zbekiston fuqarolari tashkiliy migratsiya asosida 30 dan ortiq davlatda mehnat faoliyatini olib bormoqda. Endilikda, Shvetsiya, Daniya va Norvegiya bilan hamkorlikni kengaytirish orqali fuqarolarimizni yuqori daromadli ish o‘rinlariga yo‘naltirish, shuningdek, AQSH bilan mavsumiy ishlar bo‘yicha hamkorlikni rivojlantirish topshirildi.
2. Kasb va tilga tayyorlashni kuchaytirish
Bugungi kunda Germaniya, Yaponiya va Janubiy Koreya kompaniyalari tomonidan mamlakatimizda kasb va tilga o‘qitish bo‘yicha o‘quv kurslari tashkil etilmoqda. Bundan buyon, elchilar xorijiy ish beruvchilar talabiga ko‘ra kasb va tilga o‘qitishga ham mas’ul bo‘lishi belgilandi.
3. Xorijdagi fuqarolar bilan bevosita ishlash
Elchilar va konsullarga xorijdagi fuqarolar bilan joyiga chiqib ishlash, konsullik xizmatlarini soddalashtirish, kelib tushayotgan murojaatlarni tezkor ko‘rib chiqish, bepul koll-markaz tashkil etish, hamda amaliy yordam ko‘rsatish vazifasi yuklatildi.
Prezident Shavkat Mirziyoyev xorijdagi fuqarolarimizning huquqiy maqomini ta’minlash masalasiga alohida to‘xtalib o‘tdi:
“Xorijda noqonuniy bo‘lib turgan fuqarolarimiz borligi bizni tashvishga soladi”,
– dedi davlatimiz rahbari.
O‘tgan yil Rossiyada 150 mingdan ziyod fuqaroga «migratsiya amnistiyasi»ni qo‘llashga erishildi. Boshqa mamlakatlarda ham fuqarolarimizga qonuniy asosda ishlashlariga ko‘maklashish, shu bilan birga fuqarolarimiz ham o‘zlari bo‘lib turgan davlat qonunchiligi talablariga rioya qilishlari lozimligi ta’kidlandi.