Shimoliy Nurota tog‘larida joylashgan Ko‘ktonli neolit yodgorligida yangi topilmalar aniqlandi
2025-10-21 12:00:00 / Yangiliklar
Joriy yilning oktabr oyida Madaniy meros agentligi huzuridagi Yahyo G‘ulomov nomidagi Samarqand arxeologiya instituti Tosh davri bo‘limi xodimlari Aziz Imomov va Fozilbek Tursunqulovlar tomonidan Shimoliy Nurota tog‘larida joylashgan Ko‘ktonli neolit yodgorligida qazishma ishlari amalga oshirildi.
Tadqiqot jarayonida yodgorlik atrofi ham batafsil ko‘zdan kechirilib, sargʻish-qizil tusdagi tabiiy ma’dan boʻyoqlar bilan chizilgan ko‘plab qoyatosh rasmlar aniqlandi. Ushbu rasmlar orasida qo‘l panjalari va inson tasvirlari alohida e’tiborni tortmoqda. Mutaxassislarning fikricha, mazkur tasvirlar Ko‘ktonli neolit yodgorligi madaniy qatlamlari bilan bevosita bog‘liq bo‘lishi mumkin.
Shuningdek, shunga o‘xshash qoyatosh tasvirlar ilgari Qashqadaryo viloyatida joylashgan Siypantosh yodgorligida ham aniqlangan edi. Ayni paytda Ko‘ktonli neolit yodgorligida ilmiy-tadqiqot ishlari davom ettirilmoqda.