Sentabr oyida yurtimiz bo‘ylab 500 dan ortiq madaniy tadbirlar o‘tkaziladi
2025-08-19 13:45:00 / Yangiliklar
Joriy yilning sentabr oyida mamlakatimizning barcha hududlarida jami 300 dan ortiq konsert dasturlari, 100 da ziyod spektakllar va 200 dan ortiq turli madaniy tadbirlar o‘tkazilishi rejalashtirilgan. Ular orasida O‘zbekiston Milliy simfonik orkestri ishtirokidagi konsert dasturlari, madaniyat kunlari, teatr tomoshalari, maqom kechalari, gala konsertlar hamda hududlardagi madaniyat va istirohat bog‘larida o‘tkazilishi rejalashtirilgan ko‘ngilochar tadbirlar o‘rin olgan.
Ma’lumki, O‘zbekiston Respublikasi Prezidentining 2024-yil 22-noyabrdagi “O‘zbekiston Milliy simfonik orkestri faoliyatini qo‘llab-quvvatlash hamda milliy va jahon mumtoz musiqa san’atidan aholini yanada kengroq bahramand etish chora-tadbirlari to‘g‘risida”gi 401-son qarori qabul qilingan.
Ushbu qaror mamlakatimizda milliy va jahon mumtoz musiqa san’ati asarlarini yanada ommalashtirish hamda orkestr ijrochiligini rivojlantirish, soha vakillarining kasb mahoratini oshirish, ushbu yo‘nalishda iqtidorli yoshlar uchun zarur shart-sharoitlar va imkoniyatlar yaratish, musiqa ijrochilari va orkestr jamoalari xodimlarini moddiy jihatdan qo‘llab-quvvatlashni yanada kengaytirish maqsadida har oyning 20-sanasiga qadar davlat boshqaruvi organlari, muassasalar, korxonalar va xo‘jalik jamiyatlarini, shuningdek, aholini kelgusi oyda tashkil etiladigan ommaviy-madaniy va konsert-tomosha tadbirlari dasturlari, shu jumladan, O‘zbekiston Milliy simfonik orkestri jamoasining konsert dasturlari to‘g‘risida xabardor qilib borish nazarda tutilgan.
Shu munosabat bilan Madaniy meros agentligining rasmiy veb-saytiga ushbu keng tadbirlar dasturi joylashtirildi. Eslatib o‘tamiz, Toshkent shahridagi tadbirlar va hududlaridagi teatrlarga kirish pullik bo‘lib, qolgan tadbirlar bepul etib belgilangan. Tadbirlarning kuni, joyi va vaqti o‘zgarishi mumkin. Barchangizni madaniyat va san’at kechalariga taklif etamiz!