O‘zbekiston Respublikasi Madaniy meros agentligi

Joriy yilning iyun-iyul oylari davomida Madaniy meros agentligi huzuridagi Yahyo G‘ulomov nomidagi Samarqand arxeologiya institutining “Qoyatosh rasmlarini o‘rganish guruhi” tomonidan institutning ilmiy ishlar bo‘yicha direktor o‘rinbosari Azbiddin Xolmatov rahbarligida “O‘rta Zarafshon havzasi qoyatosh rasmlari katalogini yaratish” nomli amaliy loyiha doirasida muhim arxeologik tadqiqotlar amalga oshirildi.

Mazkur loyiha doirasida Nurota tog‘ tizmasining Oqtog‘, G‘o‘bdintog‘ va Qaroqchitog‘ tog‘laridan oqib tushuvchi soy va daralarda joylashgan Qoraqismoqsoy, Yetimsoy, Alamlisoy, Andoqsoy, Oqmo‘lasoy, Kuyukdara, Burgansoy, Jizmonsoy va Sangijumonsoy yonbag‘irlaridagi qoyatosh rasmlari zamonaviy usullar asosida o‘rganilib, ro‘yxatga olindi.

Tadqiqotlar davomida ibtidoiy kishilarning ijtimoiy-iqtisodiy hayoti, e’tiqodi, dunyoqarashi va hayvonot olami haqidagi tasavvurlarini ifodalovchi ko‘plab tasvirlar aniqlandi. Ushbu rasmlar orasida odamlar, ibtidoiy buqa va sigirlar, sher, bug‘u, tog‘ echkisi, ot, qulon kabi yovvoyi hayvonlarning tasvirlari bor. Ayniqsa, tog‘ echkilarining yugurib ketayotgani va ular ortidan sherning quvib borayotgan manzarasi alohida e’tiborga loyiq. Qoyatosh rasmlari qadimgi odamlarning hayot tarzini, xo‘jalik faoliyatini, diniy qarashlarini o‘rganishda muhim ilmiy manba bo‘lib xizmat qiladi.