Jarqo‘ton yodgorligida arxeologik tadqiqotlarning dastlabki natijalari aniqlandi
2026-10-12 17:35:00 / Yangiliklar
Surxondaryo viloyatining Sherobod tumanida joylashgan bronza davrining yirik arxeologik yodgorligi hisoblangan Jarqo‘tonda arxeologik qazishma va ilmiy tadqiqot ishlari olib borilmoqda. Joriy yilning oktabr oyida boshlangan tadqiqotlarga Yahyo G‘ulomov nomidagi Samarqand arxeologiya instituti katta ilmiy xodimi, tarix fanlari nomzodi Komil Rahimov rahbarlik qilmoqda. Ekspeditsiyada Termiz davlat universiteti talabalari hamda Italiyaning Salento universiteti magistranti Francheska Kondjedo ham ishtirok etmoqda.
Tadqiqotlar davomida yodgorlikdan xom g‘ishtdan qurilgan inshootlar hamda diametri 70 santimetr bo‘lgan o‘choq aniqlangan. Ushbu topilmalar Jarqo‘ton bosqichidagi qurilish an’analari va turar joylar tuzilishini o‘rganishda muhim ahamiyatga ega. Qabristonning g‘arbiy qismida olib borilgan qazishmalar davomida qabrlarning birida to‘rtta butun sopol idish topilgan. Shuningdek, yodgorlikning asosiy hududidan tashqarida olib borilgan qazish ishlari natijasida yosh bola qabri, Sopolli madaniyatining Jarqo‘ton bosqichiga oid xo‘jalik o‘rasi va aylana shaklidagi ikkita kul o‘rasi qayd etildi.
Aniqlangan arxeologik topilmalar bronza davriga (milodddan avvalgi 3-1 ming yilliklarga) oid bo‘lib, qadimgi aholining turmush tarzi, xo‘jalik faoliyati, dafn marosimlari hamda yodgorlik hududining tarixiy rivojlanish bosqichlarini chuqurroq o‘rganish imkonini beradi. Topilmalarni qiyosiy va tipologik tahlil qilish orqali Jarqo‘tonning ayrim hududlari vazifasi va rivojlanishiga oid yangi ilmiy xulosalar olish kutilmoqda.
Ayni paytda Jarqo‘ton yodgorligida arxeologik qazishma va tadqiqot ishlari davom etmoqda.