Samarqanddagi arxeologiya yodgorligiga 6,4 mlrd. so‘mlik zarar yetkazilgani aniqlandi
2026-09-25 14:00:00 / Yangiliklar
Samarqand viloyatining Pastdarg‘om tumanida joylashgan “Tallig‘ulontepa” arxeologiya yodgorligiga og‘ir texnika yordamida zarar yetkazilganligi aniqlandi. Ijtimoiy tarmoqlarda yodgorlik buzib tashlanayotgani haqidagi xabarlar tarqalganidan so‘ng, Samarqand viloyati Madaniy meros boshqarmasi mutaxassislari tomonidan mazkur hududda o‘rganish ishlari olib borildi.
O‘rganishlar davomida arxeologiya yodgorligining ayrim qismlariga og‘ir texnika yordamida mexanik ta’sir ko‘rsatilgani va buzilgani aniqlandi. Shuningdek, yodgorlik hududiga o‘rnatilgan muhofaza belgisi noma’lum shaxs tomonidan olib tashlangani ham ma’lum bo‘ldi.
Mazkur holat yuzasidan yodgorlikka yetkazilgan moddiy zarar miqdori Vazirlar Mahkamasining 2019-yil 30-martdagi 265-son qarorining 8-ilovasi bilan tasdiqlangan “Moddiy madaniy meros ko‘chmas mulk obyektiga yetkazilgan moddiy zarar miqdorini hisoblash” metodikasi asosida hisoblab chiqildi.
2026-yil 23-sentabr kuni amalga oshirilgan hisob-kitoblarga ko‘ra, “Tallig‘ulontepa” arxeologiya yodgorligiga 6 milliard 435 million so‘m miqdorida moddiy zarar yetkazilgani aniqlandi. Aniqlangan zarar miqdori bo‘yicha tegishli dalolatnoma rasmiylashtirilib, holatga qonuniy baho berish uchun zarur hujjatlar Samarqand viloyati prokuraturasiga yuborildi.
Ma’lumot uchun, V–VI hamda X–XII asrlarga oid “Tallig‘ulontepa” arxeologiya yodgorligi Vazirlar Mahkamasining 2019-yil 4-oktabrdagi 846-son qarori bilan tasdiqlangan Moddiy madaniy merosning ko‘chmas mulk obyektlari milliy ro‘yxatiga kiritilgan hamda Samarqand viloyati Madaniy meros boshqarmasiga operativ boshqaruv huquqi asosida biriktirilgan.