Bobur ko‘chasi, 7-uydagi madaniy meros obyektini saqlash masalasi yuzasidan Bosh prokuraturaga murojaat yuborildi
2026-09-08 19:20:00 / Yangiliklar
Madaniy meros agentligi Toshkent shahri, Yakkasaroy tumani, Bobur ko‘chasi, 7-uy manzilida joylashgan moddiy madaniy meros obyektining saqlanishini ta’minlash masalasi yuzasidan O‘zbekiston Respublikasi Bosh prokuraturasiga murojaat qildi.
Mazkur bino moddiy madaniy meros obyekti sifatida davlat muhofazasida hisoblanadi.
2020-yilda Agentlik huzuridagi Ilmiy-ekspert kengashi tomonidan mazkur binoni Moddiy madaniy meros obyektlarining Milliy ro‘yxatiga kiritish masalasi ma’qullangan. 2021-yilda esa obyektni Milliy ro‘yxatdan chiqarish to‘g‘risidagi taklif rad etilgan. Agentlikning amaldagi pozitsiyasi mazkur obyektni Milliy ro‘yxatdan chiqarish maqsadga muvofiq emas, degan xulosaga asoslanadi.
Shu bilan birga, holatni o‘rganish davomida Toshkent shahar hokimining 2018-yil 30-oktabrdagi 1550-son qaroriga asosan «UNIVERSAL PACKING MASTERS» MChJga mazkur manzilda mavjud turar joy va noturar joy binolarini buzish hamda ushbu hududda ko‘p qavatli turar joy binosi qurish uchun yer uchastkasi ajratilgani aniqlandi.
Mazkur qaror bino moddiy madaniy meros obyekti sifatidagi huquqiy maqomi belgilanishidan avval qabul qilingan.
«Mazkur vaziyatda barcha holatlarga — binoni buzish to‘g‘risidagi qaror qabul qilinganidan tortib, obyektning bugungi kundagi huquqiy maqomigacha — xolis huquqiy baho berilishi prinsipial jihatdan muhim, deb hisoblaymiz. Bizning vazifamiz — o‘tmishda qabul qilingan ma’muriy qarorlar bugungi kunda madaniy meros obyektining yo‘qotilishiga asos bo‘lib qolishiga yo‘l qo‘ymaslik. Shu sababli Agentlik Bosh prokuraturaga murojaat qildi va qonunchilikda nazarda tutilgan choralar ko‘rilishiga umid qilmoqda», — dedi Madaniy meros agentligi direktorining birinchi o‘rinbosari Elmurod Najimov.
Agentlik murojaatida Toshkent shahar hokimining 2018-yil 30-oktabrdagi 1550-son qarorining amaldagi qonunchilik, shu jumladan, madaniy merosni muhofaza qilish sohasidagi qonunchilik talablariga muvofiqligiga huquqiy baho berish so‘ralgan.
Qonunchilik buzilishi holatlari aniqlangan taqdirda, Agentlik mazkur qarorni belgilangan tartibda bekor qilish yoki qayta ko‘rib chiqish bo‘yicha qonunchilikda nazarda tutilgan choralarni ko‘rishni so‘ragan.
Bundan tashqari, obyektning saqlanishini ta’minlash, uning buzib tashlanishi, shikastlanishi yoki tarixiy-madaniy qiymatiga boshqa turdagi zarar yetkazilishining oldini olish bo‘yicha zarur choralarni ko‘rish masalasi ham qo‘yilgan.
Agentlik obyektning saqlanishini ta’minlash maqsadida qonunchilikda nazarda tutilgan choralarni izchil amalga oshirishda davom etmoqda. Barcha huquqiy masalalarga oydinlik kiritilgunga qadar obyekt davlat muhofazasida bo‘lib, uning holati doimiy monitoring qilib borilmoqda.
Agentlik madaniy meros obyektlariga oid masalalar faqat qonunchilik doirasida, ularning tarixiy-madaniy qiymati hamda kelajak avlodlar uchun asrab-avaylash zarurati hisobga olingan holda hal etilishi lozim, degan tamoyildan kelib chiqadi.