Bakuda saqlanayotgan O‘zbekistonga oid qo‘lyozmalar o‘rganildi
2024-09-12 09:40:00 / Yangiliklar
Joriy yilning 29-avgust – 5-sentabr kunlari Madaniy meros agentligining Badiiy ekspertiza boshqarmasi mutaxassislari Ozarbayjon Respublikasining poytaxti Baku shahrida ilmiy xizmat safarida bo‘lib qaytdi. Xodimlar safar davomida Baku shahridagi ilmiy-madaniy muassasalarda saqlanayotgan O‘zbekistonga oid madaniy boyliklarni aniqlash va ularga oid ma’lumotlarni yig‘ish bilan shug‘ullandi.
Mutaxassislar ilmiy safar davomida Ozarbayjon Milliy akademiyasi Muhammad Fuzuliy nomidagi qo‘lyozmalar instituti fondida saqlanayotgan o‘zbekistonlik mutafakkir va allomalarning qalamiga mansub ko‘plab asarlar bilan tanishish va ma’lumotlarni yig‘ishga erishdi.
Xususan, ushbu institut fondidagi arab, fors, ozarbayjon, turk va o‘zbek tillarida yozilgan 11 mingdan ortiq qo‘lyozmalar orasida Alisher Navoiy asarlarining 70 dan ortiq soni mavjudligi alohida e’tiborga molik bo‘ldi. Bundan tashqari fondda Abdurahmon Jomiyning – 40 ta, Nasiriddin Tusiyning – 20, Burhoniddin Zarnujiyning – 25 dan ortiq va Davlatshoh Samarqandiyning – 15, Sadr Sharia Buxoriy asarlarining – 14 nusxasi borligi aniqlandi.
Izlanishlar natijasida Asiruddin Axsikatiy, Hofiz Tanish Buxoriy, Ismat Buxoriy, Badruddin Chochiy, Jaloluddin Davoniy, Sayyid Sharif Jurjoniy,Voiz Koshifiy, Najmuddin Kubro, Mirxond, Ali Qushchi, Abu Lays Samarqandiy, Farhod Samarqandiy, Mas’ud ibn Umar at-Taftazoniy, Xondamir, Sharofuddin Ali Yazdiy kabi qariyb 35 mo‘tabar allomalarning 300 dan ortiq qo‘lyozma asarlari nusxalari haqidagi dastlabki ma’lumotlar to‘plandi.
Asarlar nusxalariga oid jamlangan dastlabki ilmiy tavsiflar o‘z ichiga: asar muallifi, asarning nomi, xat turi, ko‘chirilgan vaqti, asar hajmi kabi ma’lumotlarni qamrab oladi.
Eslatib o‘tamiz, yuqoridagi dastlabki ma’lumotlarning ilmiy tadqiqoti yakunlangach asarlarga oid qisqacha ilmiy tavsiflar tuziladi hamda ularni ilmiy guruh tadqiqotlari samarasi sifatida tayyorlanayotgan “O‘zbekistonga oid xorijdagi qo‘lyozma asarlar reyestri”ning navbatdagi 4 va 5-jildlariga kiritish rejalashtirilgan.