Tarixiy voqea: Toshkent modernizmining 10 ta binosi YUNESKO Butunjahon merosi ro‘yxatiga kiritildi
2026-07-26 22:20:00 / Yangiliklar
YUNESKO Butunjahon merosi qo‘mitasining Koreya Respublikasining Pusan shahrida bo‘lib o‘tgan 48-sessiyasi yakunlariga ko‘ra, “Toshkent modernizm me’morchiligi. Markaziy Osiyoda zamonaviylik va an’analar” milliy nominatsiyasi Butunjahon merosi ro‘yxatiga kiritildi.
Mazkur nominatsiya tarkibidagi Toshkent modernizmining 10 ta noyob me’moriy obyekti YUNESKOning eng nufuzli xalqaro meros ro‘yxatidan joy oldi. Bu qaror O‘zbekistonning zamonaviy me’morchilik merosini xalqaro miqyosda e’tirof etish yo‘lidagi muhim tarixiy qadam bo‘ldi.
YUNESKO Butunjahon merosi qo‘mitasi 1972-yilgi Konvensiya doirasida dunyoning eng muhim madaniy va tabiiy meros obyektlarini muhofaza qilish bo‘yicha qarorlar qabul qiluvchi nufuzli xalqaro organ hisoblanadi. O‘zbekiston delegatsiyasi 2026-yil 19–29-iyul kunlari Pusan shahrida o‘tkazilgan mazkur sessiyada faol ishtirok etdi.
Ro‘yxatdan Toshkent shahridagi “Marvarid” (“Jemchug”) turar-joy binosi, O‘zbekiston tarixi davlat muzeyi, “Xalqlar do‘stligi” saroyi, O‘zbekiston davlat san’at muzeyi, Toshkent davlat sirki, O‘zbekiston Badiiy akademiyasining Markaziy ko‘rgazmalar zali, O‘zbekiston kino san’ati saroyi, “Eski Juva” bozori (Chorsu), “Kosmonavtlar” metro bekati hamda Toshkent viloyatidagi “Quyosh” geliokompleksi o‘rin olgan.
Mazkur obyektlar XX asrning ikkinchi yarmiga oid modernistik me’morchilikning eng yorqin namunalaridan bo‘lib, ularda zamonaviy me’moriy yechimlar Markaziy Osiyoning milliy an’analari bilan uyg‘unlashgan.
Ushbu qaror natijasida “Toshkent modernizm me’morchiligi. Markaziy Osiyoda zamonaviylik va an’analar” nominatsiyasi O‘zbekistonning YUNESKO Butunjahon merosi ro‘yxatidagi oltinchi madaniy meros obyektiga aylandi. Shuningdek, bu O‘zbekistonning so‘nggi 25 yil ichida YUNESKO Butunjahon merosi ro‘yxatiga kiritilgan ilk milliy nominatsiyasi hisoblanadi.
Bundan tashqari, O‘zbekiston XX asr modernistik me’morchilik merosini YUNESKO Butunjahon merosi ro‘yxatiga kiritgan Markaziy Osiyo va MDH hududidagi birinchi mamlakat bo‘ldi. Bu yutuq mamlakatimizning me’moriy merosini asrash, ilmiy o‘rganish va xalqaro miqyosda targ‘ib etish borasidagi izchil sa’y-harakatlarning yana bir muhim natijasi sifatida e’tirof etilmoqda.