O‘zbekiston Respublikasi Madaniy meros agentligi

Joriy yilning 25–26-iyun kunlari Samarqand shahrida Madaniy meros agentligi Ilmiy-ekspert kengashining navbatdagi sayyor yig‘ilishi bo‘lib o‘tadi. Unda respublikaning turli hududlaridagi moddiy madaniy meros obyektlarini muhofaza qilish, restavratsiya qilish, ulardan foydalanish hamda tarixiy hududlarda amalga oshirilishi rejalashtirilgan qurilish va obodonlashtirish loyihalariga oid 93 ta muhim masala muhokama qilinadi.
 
Kun tartibidan Buxoro, Jizzax, Namangan, Navoiy, Samarqand, Toshkent, Qashqadaryo va Xorazm viloyatlarida joylashgan madaniy meros obyektlari bilan bog‘liq masalalar o‘rin olgan. Jumladan, Buxoro shahridagi “Masjidi Kalon” majmuasini restavratsiya qilish, Namangan viloyatidagi “Haqulobod” masjidi, “Maxdumi A’zam” maqbarasi hamda “Bibi mushkulkushod” maqbarasida ta’mirlash ishlarini amalga oshirish loyihalari ko‘rib chiqiladi.
 
Shuningdek, Xiva shahridagi “Allakulixon madrasasi”ni mehmonxona sifatida moslashtirish, Toshkent shahridagi Temuriylar tarixi davlat muzeyi binosini rekonstruksiya qilish hamda hududini obodonlashtirish, Navoiy viloyatidagi “Nur qal’asi” arxeologik obyektini muzeylashtirish, vizit-markaz qurish va hududni muhofaza qilishga qaratilgan qator loyihalar kengash muhokamasiga qo‘yilgan.
 
Bundan tashqari, YUNESKOning Umumjahon merosi ro‘yxatiga kiritilgan tarixiy hududlarda joylashgan turar va noturar binolarni qurish, qayta qurish, moslashtirish, obodonlashtirish hamda muhofaza hududlarida infratuzilma obyektlarini joylashtirishga oid qator loyihalar ko‘rib chiqilishi belgilangan. Yig‘ilish davomida ayrim madaniy meros obyektlarini Milliy ro‘yxatga kiritish yoki undan chiqarish bo‘yicha takliflar ham muhokama etiladi.
 
Ilmiy-ekspert kengashi kun tartibidagi masalalarning batafsil ro‘yxati bilan Madaniy meros agentligining rasmiy veb-sayti orqali tanishish mumkin.