Madaniy meros agentligi barcha davlat idoralari va tadbirkorlarni merosga bo‘lgan hurmatni saqlashga chaqiradi
2026-04-14 20:25:00 / Yangiliklar
2026-yil 14-aprel kuni Toshkent shahri, Chilonzor tumani, Furqat ko‘chasi 3-uyda joylashgan Madaniyat vazirligi tasarrufidagi “Xalqlar do‘stligi saroyi” hududida Madaniy meros agentligi va uning Toshkent shahar hududiy boshqarmasi mutaxassislari tomonidan davlat nazorati (monitoring) ishlari olib borildi.
Vazirlar Mahkamasining 649-son qarori (15.10.2021) bilan tasdiqlangan nizomga muvofiq, madaniy meros obyektlarida monitoring jarayonida aniqlangan o‘rganishlar natijasida mazkur madaniy meros obyektida reklama bannerlari hech qanday ruxsatsiz, o‘zboshimchalik bilan o‘rnatilgani aniqlandi.
Ma’lumot uchun: O‘zbekiston Respublikasi “Reklama to‘g‘risida”gi Qonunning 26-moddasida tashqi reklama va axborot obyektlariga (konstruksiyalariga) doir asosiy talablar belgilab berilgan. Unga ko‘ra, moddiy madaniy meros obyektlarida tashqi reklamani joylashtirish taqiqlanadi. Holat yuzasidan noqonuniy bannerlar zudlik bilan olib tashlandi hamda mas’ullarga nisbatan tegishli choralar ko‘rish bo‘yicha ogohlantirish berildi.
Eslatib o‘tamiz: O‘zbekiston Respublikasi Ma’muriy javobgarlik to‘g‘risidagi kodeksning 641-moddasida Moddiy madaniy meros obyektlariga nisbatan hurmatsizlik bilan munosabatda boʻlganlik uchun javobgarlik belgilangan.