Madaniy merosni saqlash mavzusidagi respublika tanlovi g‘oliblari taqdirlandi
2026-02-13 18:00:00 / Yangiliklar
YUNESKO ishlari bo‘yicha O‘zbekiston Respublikasi Milliy komissiyasi tashabbusi bilan O‘zbekiston Madaniy meros agentligi va hamkor tashkilotlar tomonidan respublika miqyosida “Madaniy merosni saqlash” mavzusidagi eng yaxshi esse hamda “Madaniy merosni saqlash: huquqiy va iqtisodiy yondashuvlar” mavzusidagi eng yaxshi ilmiy maqolalar tanlovi e’lon qilingan edi. Tanlov 2025-yil 15-noyabrdan 10-dekabrga qadar davom etib, unga 300 dan ortiq ijodiy ishlar kelib tushdi.
Tanlov jarayoni ikki bosqichli saralashdan iborat bo‘ldi:
- dastlabki bosqichda 51 ta ilmiy maqola (mutaxassislar) va 62 ta esse (bakalavriat talabalari) tanlov mezonlariga mos deb topildi;
- shaffoflikni ta’minlash maqsadida barcha ishlar aksilplagiat tekshiruvidan o‘tkazilib, 2026-yilning 7-yanvarida Milliy komissiyaga taqdim etildi.
Yakuniy baholashda 2 ta eng yaxshi esse va 2 ta eng yaxshi ilmiy maqola taqdirlashga loyiq deb topildi.
2026-yil 13-fevral kuni O‘zbekiston amaliy san’at va hunarmandchilik tarixi davlat muzeyida tantanali taqdirlash marosim bo‘lib o‘tdi. Tadbirda tanlov ishtirokchilari, Madaniy meros agentligi xodimlari, muzey mutaxassislari va OAV vakillari qatnashdilar. So‘zga chiqqanlar yosh ijodkorlarning madaniy merosni o‘rganish va targ‘ib etishdagi faolligini yuqori baholadilar.
G‘oliblarga quyidagi mukofotlar topshirildi:
Ilmiy maqolalar (1000 AQSh dollaridan har biri):
- Toshkent davlat yuridik universiteti “Davlat boshqaruvi” kafedrasi katta o‘qituvchisi Nurillo Tuxtasinov.
- O‘zbekiston tarixi davlat muzeyi ilmiy xodimi, tarix fanlari bo‘yicha falsafa doktori (PhD) Aliya Bekenova.
Esselar (500 AQSh dollaridan har biri):
- Samarqand davlat arxitektura-qurilish universitetining muzeyshunoslik yo‘nalishi magistranti Dilnoza Abdusaidova.
- Namangan davlat universiteti talabasi Ozodaxon Inomova.
Mazkur tanlov madaniy merosni saqlash sohasida ilmiy-ijodiy salohiyatni qo‘llab-quvvatlash, yoshlar va mutaxassislar orasida huquqiy madaniyatni yuksaltirish va madaniy merosni jozibador sohaga aylantirishga xizmat qiladi.