O‘zbekiston Respublikasi qishloq xo‘jaligi vazirligi huzuridagi o‘simliklar karantini va himoyasi agentligi

O‘simliklar karantini va himoyasi agentligi tomonidan 2024-yil mart oyidan boshlab REG.EFITO.UZ avtomatlashtirilgan axborot tizimi tajriba tariqasida ishga tushirildi.
Bu tizim bilan mineral o‘g‘itlar, pestitsidlar, biologik va kimyoviy vositalarni sinovdan o‘tkazish va ro‘yxatdan o‘tkazish jarayonlari to‘liq raqamlashtirildi.

Endi barcha hujjatlar elektron shaklda yuritiladi va barcha tasdiqlash, ko‘rib chiqish va axborot almashinuvi jarayonlari faqat onlayn tarzda amalga oshiriladi. Bu esa vaqt, qog‘oz va ortiqcha byurokratik jarayonlar keskin kamayishiga olib keladi.

REG.EFITO.UZ tizimining asosiy afzalliklari:

qog‘ozsiz jarayon — barcha arizalar, hujjatlar va qarorlar elektron shaklda yuritiladi.
vaqt va resurslarni tejash imkoniyati— korxonalar va fermerlar arizalarni masofadan turib yuboradi, natijalarni esa onlayn kuzatadi.
shu’ba va bosqichlar ustidan to‘liq monitoring — tizimda har bir harakat qayd etiladi.
inson omili kamayadi — qarorlar avtomatik tarzda shakllantiriladi, bu esa sub’ektivlik va xatoliklarni kamaytiradi.
korrupsiya xavfi minimallashtirilgan — foydalanuvchi va davlat xizmatchisi o‘rtasidagi to‘g‘ridan-to‘g‘ri aloqa deyarli yo‘q.
axborot xavfsizligi — barcha hujjatlar elektron raqamli imzo (ERI) orqali tasdiqlanadi.
tahliliy ma’lumotlar shakllantirilishi imkoniyati — tizimdagi ma’lumotlar asosida ilmiy va statistik tahlillar amalga oshiriladi.

Ro‘yxatga olingan har bir o‘g‘it yoki pestitsid bo‘yicha guvohnoma shakllangach, ma’lumotlar “karantin.uz” saytida va “Agroko‘makchi” mobil ilovasida avtomatik tarzda paydo bo‘ladi. Natijada

 Fermerlar va agroklasterlar ro‘yxatdan o‘tgan vositalarni real vaqt rejimida tekshira oladi.
 Inspektorlar nazoratni joyidan turib mobil ilova orqali amalga oshiradi.
 Rasmiy ruxsat etilgan vositalar ochiq e’lon qilinadi — bu shaffoflikni ta’minlaydi.
 Ma’lumotlar inson aralashuvisiz tizimga kiritiladi, bu esa korrupsiya holatlarining oldini oladi.

Bugungi kunda REG.EFITO.UZ tizimiga:

• Ekologiya, atrof-muhitni muhofaza qilish va iqlim o‘zgarishi vazirligi,
• Sanitariya-epidemiologik osoyishtalik qo‘mitasi,
• 15 ta sinov tashkiloti
• va 4 ta akkreditatsiyadan o‘tgan laboratoriya faoliyati integratsiya qilingan.

Ma’lumot o‘rnida qayd etish lozim, 2024-yil boshidan buyon tizim orqali 1952 ta ariza qabul qilingan. Shundan

1228 tasi — o‘simliklarni himoya qilish vositalariga,
724 tasi — mineral va organik o‘g‘itlarga tegishli.