O‘zbekiston Respublikasi qishloq xo‘jaligi vazirligi huzuridagi o‘simliklar karantini va himoyasi agentligi

Joriy yilning 2-aprel kuni O‘simliklar karantini va himoyasi agentligi tizimida korrupsiyaga qarshi kurashish yo‘nalishida ZOOM platformasida yig‘ilish tashkil etildi. Unda Korrupsiyaga qarshi kurashish bo‘limi hamda Tashqi karantin nazorati bo‘limi mas’ul xodimlari ishtirok etdi. Jumladan, O‘simliklar karantini chegara maskanlari (O‘KChM) va tashqi iqtisodiy faoliyat (TIF) maskanlarida xizmat olib borayotgan davlat karantin inspektorlari, shuningdek, hududiy bo‘linmalarning tashqi karantin yo‘nalishiga mas’ul rahbar o‘rinbosarlari va xodimlari jalb qilindi.
Yig‘ilishda Korrupsiyaga qarshi kurashish bo‘limi mas’ullari tomonidan ishtirokchilarga o‘z xizmat vazifalarini amaldagi qonunchilik, normativ-huquqiy hujjatlar hamda ichki-idoraviy tartiblar asosida olib borish zarurligi eslatib o‘tildi. Shuningdek, har qanday huquqbuzarlik holatlariga nisbatan murosasiz munosabatda bo‘lish, korrupsiyaga oid xatti-harakatlarning oldini olish har bir xodimning bevosita vazifasi ekani ta’kidlandi.
Mutaxassislar tomonidan korrupsiyaga qarshi kurashish faqat nazorat organlarining vazifasi emas, balki har bir xodimning shaxsiy mas’uliyati ekanligi qayd etildi. Shu bilan birga, qonunbuzarlik holatlariga yo‘l qo‘yilgan taqdirda javobgarlik muqarrarligi, bunday holatlar tizim obro‘siga va fuqarolarning davlat tashkilotiga bo‘lgan ishonchiga jiddiy putur yetkazishi mumkinligiga alohida e’tibor qaratildi.