Xavfsiz oziq-ovqat sari: Germaniya fitosanitar xizmati bilan uchrashuv tafsilotlari
2026-03-29 16:45:00 / Yangiliklar
Germaniyada tashkil etilgan «study tour» doirasida O‘simliklar karantini va himoyasi agentligi direktori Ibrohim Ergashev Germaniya Qishloq xo‘jaligi, oziq-ovqat va hududiy birlik Federal vazirligining fitosanitar va veterinar nazorat rahbari Betina Birbaum bilan uchrashdi.
Muloqotda O‘zbekiston va Germaniyada qishloq xo‘jaligi mahsulotlari xavfsizligi, o‘simliklar himoyasi va hayvonlar sog‘ligini ta’minlash bo‘yicha amalga oshirilayotgan tizimli ishlar muhokama qilindi.
Tomonlar ikki davlatning fitosanitar nazorat tizimlarining integratsiyalashuvini davom ettirish, qishloq xo‘jaligi mahsulotlari eksportida zaruriy standartlarga amal qilish, laboratoriya tahlillari va xavflarni baholash tizimida hamkorlikni mustahkamlash masalalarini ko‘rib chiqishdi.
Ma’lumot uchun, mazkur vazirlik Germaniyada qishloq xo‘jaligi, oziq-ovqat xavfsizligi va qishloq hududlarini rivojlantirish uchun mas’ul federal organ hisoblanadi.
Germaniya Yevropa Ittifoqidagi eng yirik agrar ishlab chiqaruvchilardan biri bo‘lib, mamlakatda 260 mingdan ortiq qishloq xo‘jaligi xo‘jaliklari faoliyat yuritadi.
Shuningdek, Germaniyada fitosanitar nazorat jarayonlari ilmiy asoslangan bo‘lib, laboratoriya tarmoqlari yuqori aniqlikdagi tahlillar bilan ta’minlangan. Shu sababli muloqotda aynan mazkur yo‘nalishga e’tibor qaratildi. Bunda talab yuqori bo‘lgan mahsulotlarning oziq-ovqat xavfsizligi talablariga qat’iy rioya qilgan holda eksport qilishni ta’minlashga kelishib olindi.
Hamkorlik yo‘nalishlari sifatida mutaxassislarning tajriba almashinuvini yo‘lga qo‘yish, fitosanitar xavflarni baholash bo‘yicha hamkorlik ko‘rib chiqildi.