O‘zbekiston Respublikasi Oliy ta’lim, fan va innovatsiyalar vazirligi huzuridagi Innovatsion rivojlanish agentligi

Bugun, 14-may kuni Innovatsion rivojlanish agentligi direktori Birlashgan Arab Amirliklarining Hamdan Bin Muhammad Aqlli universiteti rektori, doktor Mansur Alavar boshchiligidagi delegatsiya bilan uchrashdi. 

Ma’lumot uchun: Hamdan Bin Muhammad Aqlli universiteti (HBMSU) – Birlashgan Arab Amirliklarining Dubay shahridagi yetakchi oliy taʼlim muassasasi hisoblanib, universitet 2002- yilda Dubay valiahd shahzodasi shayx Hamdan Bin Muhammad Bin Rashid Al Maktum homiyligida tashkil etilgan. HBMSU ilgʻor texnologiyalar orqali innovatsion va moslashuvchan taʼlim modellarini taklif qiluvchi arab dunyosidagi birinchi akkreditatsiyadan oʻtgan aqlli universitet sifatida tan olingan. Universitetning o‘ziga xosligi unda aqlli ta’lim: onlayn, masofaviy ta’lim shakllarining uyg‘unligi hamda zamonaviy raqamli raqamli texnologiyalar, sun’iy intellektdan keng foydalanishdadir. Kelajak ko‘nikmalari hamda ta’limning raqamli transformatsiyasi ushbu intellektual universitetning strategik ustuvorligi hisoblanadi.

Uchrashuv davomida doktor Mansur Alavar HBMSUning masofaviy ta’limni joriy etish borasidagi 23 yillik tajribasi bilan o‘rtoqlashdi. U bu yo‘lda yuzaga kelgan qiyinchiliklar va erishilgan yutuqlar haqida fikr almashdi.

Uchrashuv yakunida ilmiy tadqiqotlarni hamkorlikda amalga oshirish, ta’lim yo‘nalishida innovatsiyalarni joriy etish hamda yurtimizdagi oliy ta’lim muassasalari bilan hamkorlikda raqamli ta’limni rivojlantirish va qo'shma o'quv dasturlari bo‘yicha takliflar berildi.