Vengriyada xizmat safarida bo‘lib turgan delegatsiyamiz vakillari Mako shahrida bo‘lishdi
2025-12-04 19:20:00 / Yangiliklar
Dasturga muvofiq shahar hokimi Eva Erjebet Farkash bilan rasmiy uchrashuv o‘tkazildi. Ikki tomonlama muloqot davomida Mako shahrining iqtisodiy, investitsion va sayyohlik salohiyati bo‘yicha batafsil ma’lumot berildi. Shuningdek, respublikamiz hududlarida innovatsion ekotizimni rivojlantirish, yoshlarni qo‘llab-quvvatlash, texnoparklar imkoniyatlarini kengaytirish bo‘yicha amalga oshirilayotgan ishlar xususida fikr almashildi.
Mako shahri Marosh daryosi bo‘yida, Ruminiya chegarasiga yaqin manzilda joylashgan bo‘lib, 23 mingga yaqin aholi istiqomat qiladi. Shahar qishloq xo‘jaligi, turizm va sanoat sohalari bilan tanilgan bo‘lib, “Mako piyozi” Vengriyaning mashhur brendlaridan biridir. Termal sog‘lomlashtirish infratuzilmasi, jumladan “Hagymatikum Termal & SPA” markazi, shuningdek, tarixiy me’moriy obidalar va gastronomik tadbirlar shaharning turistik jozibasini oshiradi.
Delegatsiyaning navbatdagi manzili “Vall-Ker Kft.” kamin ishlab chiqarish zavodi bo‘ldi. Bu yerda nafaqat metall kaminlar, balki turli isitish pechlari, grill uskunalari va metall konstruksiyalarni ishlab chiqarish jarayoni bilan tanishildi. Zavod metallni kesish, buklash, payvandlash va bo‘yash kabi jarayonlarni avtomatlashtirgani hisobiga kuniga 200 tagacha mahsulot yig‘ish quvvatiga ega. Korxona mahalli bozorga mahsulot yetkazib berish barobarida Germaniya, Daniya, Buyuk Britaniya kabi davlatlarga eksportni yo‘lga qo‘ygan.
Tashrif davomida olingan ma’lumotlar sanoat texnologiyalarini o‘rganish, zamonaviy uskunalarni mahalliylashtirish va ishlab chiqarish samaradorligini oshirish bo‘yicha istiqbolli yo‘nalishlarni belgilashga xizmat qildi.
Avvalroq delegatsiyamiz vakillarining Chongrad-Chanad viloyati Kengashi Raisi Andrash Magori boshchiligida mahalliy fermerlar, sanoat va innovatsion klasterlar hamda yirik tadbirkorlik subyektlari vakillari bilan uchrashganlari haqida yozgan edik.
🔹Eslatib oʻtamiz, mazkur xizmat safari Oʻzbekiston Respublikasi Prezidentining 2025-yil 28-iyul kuni Andijon viloyatida islohotlar natijadorligi, hududlarda ishlarning borishi hamda aholini qiynayotgan masalalarga yechim topish boʻyicha amalga oshirilishi lozim boʻlgan ustuvor vazifalar yuzasidan oʻtkazilgan yigʻilishda belgilangan topshiriqlar boʻyicha 39-son bayonda belgilangan ustuvor vazifalar ijrosi yuzasidan tashkil etilgan boʻlib, joriy yilning 5-dekabr sanasiga qadar davom etadi.