Ichki ishlar vazirligi rahbariyati tomonidan Andijon viloyati hududlarida 2025-yil yakunlariga bagʻishlangan carhisob yigʻilishi oʻtkazildi
2026-01-23 11:00:00 / Yangiliklar
Oʻtgan davr mobaynida viloyat hududida jinoyat va huquqbuzarliklarning oldini olish borasida amalga oshirilgan ishlar, yoʻl qoʻyilgan xato va kamchiliklar hamda kelgusidagi ustuvor vazifalar muhokamasiga bagʻishlangan yigʻilishda Ichki ishlar vaziri oʻrinbosari, general-mayor B.Yu.Mirzaraximov, viloyat IIB boshligʻi boshqarma boshligʻi oʻrinbosarlari, sohaviy xizmat hamda shahar-tuman IIB rahbarlari ishtirok etishdi.
Viloyat IIB boshligʻi soʻz olib, kun tartibidagi masalalar bilan tanishtirdi. Soʻng viloyat hududida huquqbuzarlik va jinoyatchilikning barvaqt oldini olish, kriminogen vaziyati ogʻir boʻlgan hududlar, jinoyatchilikni jilovlashda yoʻl qoʻyilgan kamchiliklar va bu borada ichki ishlar boʻlimlari va sohaviy xizmatlarning faoliyatlari tahlil qilindi.
Yigʻilish davomida oʻtgan yilda jamoat tartibini saqlash, huquqbuzarliklarning oldini olish, jinoyatchilikka qarshi kurashish, aholi xavfsizligini taʼminlash borasida amalga oshirilgan ishlar tahlil qilinib, mavjud kamchiliklar va ularni bartaraf etish choralari muhokama qilindi.
Shuningdek, 2026-yil uchun ustuvor vazifalar belgilab olinib, profilaktik tadbirlarni yanada kuchaytirish, raqamli texnologiyalardan samarali foydalanish, xizmat intizomini mustahkamlash hamda aholi bilan ochiq muloqotni kengaytirishga alohida eʼtibor qaratish zarurligi taʼkidlandi.
Yigʻilish soʻngida Ichki ishlar vaziri oʻrinbosari, general-mayor Bahodir Mirzarahimov, Vatanimiz tinchligi va el-yurt osoyishtaligini taʼminlash yoʻlidagi koʻp yillik fidokorona xizmatlari, jinoyatchilikka qarshi kurash va uni oldini olish borasida mardlik va jasorat namunalarini koʻrsatib, hamkasblariga oʻrnak boʻlib xizmat qilib kelayotgan bir guruh xodimlar ragʻbatlantirildi.
Andijon viloyati IIB Axborot xizmati