Viloyat hokimi Botir Zaripov “Pozagari” mahallasidagi “Jo‘shqin Pirmast” fermer xo‘jaligi faoliyatini ham ko‘zdan kechirdi.
2026-05-02 14:30:00 / Yangiliklar
O‘tgan yillarda xo‘jalikda “Qizilcho‘l” zotli qoramol parvarishlangan bo‘lsa, keyinchalik naslchilikni yaxshilash maqsadida Germaniya davlatidan 50 boshga yaqin “Golshteyn” zotiga mansub nasldor qoramol, bo‘g‘oz g‘unajin xarid qilingani mahsuldorlikni oshirishga xizmat qilmoqda.
Bugunga kelib esa xo‘jalik chorva kompleksi 400 boshdan ortiq qoramoliga ega bo‘lib, yarmiga yaqini “Golshteyn” va “Smental” zotlariga mansub. Chorva mollarining 70 boshga yaqini sog‘in sigir, ulardan kunlik 900 litrdan orttirib sut sog‘ib olinmoqda. Qolaversa, yetmish boshdan ziyod buzoq, yana shuncha g‘unajin va bo‘rdoqiga boqilayotgan yuzga yaqin ho‘kiz parvarishiga e’tibor qaratilmoqda.
Akmal Teshayev tashabbusi bilan chorva kompleksi ichida sutni qayta ishlash syexi ochilganiga ham 2 yildan oshgan. Ayni kunda Turkiya va Xitoy texnologiyasi asosida jihozlangan kichik korxonada bir kecha-kunduzda 1 tonnadan oshiq sut mahsuloti qayta ishlanmoqda.
Ko‘p tarmoqli fermer xo‘jaligida “MILAKTO” yorlig‘i ostida qatiq, qaymoq, suzma, tvorog, brinza kabi o‘nga yaqin turdagi xaridorgir mahsulot qadoqlanib, tuman bozori va savdo do‘konlari orqali aholi dasturxoniga yetkazilmoqda. Chorva kompleksidagi bo‘rdoqichilik pavilonidan esa o‘tgan 2025-yilda 80 tonna atrofida go‘sht yetishtirilib, elimiz dasturxoniga tortiq qilingan.
Ayni bahor kunlarida mazkur fermer xo‘jaligi mirishkorlari 10 gektar yerda kartoshka ham yetishtirmoqda. Hademay, bundan 250 tonnadan ko‘p kartoshka yetishtirish ko‘zlangan. Shuningdek, fermer xo‘jaligining yana bir daromad manbai 2016-yildan qurilgan va bugunga kelib 3 gektarga yetkazilgan, Turkiya texnologiyasi asosida barpo qilingan issiqxonasidir. Issiqxonada peshma-pesh pomidor va bodring yetishtirilayotgani, o‘tgan yili olingan hosil salmog‘i 250 tonnaga yetkazilgan.
Suv tanqisligi oldini olish maqsadida xo‘jalik mirishkorlari o‘tgan yili 3 gektarli issiqxonani to‘liq tomchilatib sug‘orish texnologiyasi bilan ta’minlab, unda mahsulot yetishtirishni gidroponika usuliga o‘tkazib, mahsulot yetishtirish hajmini oshirishga erishmoqdalar.
Takroriy ekin o‘rnida esa bodring, bulg‘or qalampiri, oshqovoq, loviya, karam, sabzi yetishtirilib, ishchilar jamoasi ro‘zg‘origa, ortgan mahsulot esa mahalladoshlar dasturxoniga yetkazilmoqda. Zero, avvalo, xo‘jalikda mehnat qilayotgan yigirmadan ortiq doimiy ishchi oilasi daromadini oshirish, ro‘zg‘ori to‘kinligini ta’minlashga e’tibor qaratilmoqda.